Ang paghukom nga ipakanaog sa (mga) tawo nga adunay awtoridad. (2Sa 8:15; 1Ha 3:16-28; 10:9; 2Ha 25:6; 2Cr 19:8-10) Si Jehova nga Diyos, ingong Maghuhukom, Maghahatag-Lagda, ug Hari (Isa 33:22), mihatag sa nasod sa Israel ug detalyadong kodigo sa mga balaod. Ang iyang mga hukom sa mga butang labot sa balaod nagtaganag mga sumbanan sa paghukom sa mga butang nga naglangkit sa mga indibiduwal ug sa pangsulod ug panggawas nga mga kalihokan sa nasod.​—Tan-awa ang KORTE, HUDISYAL NGA; BALAOD; LEGAL NGA KASO.

Kadaghanan niining hudisyal nga mga hukom gihatag ngadto sa nasod sa Israel didto sa Bukid sa Sinai. (Neh 9:13) Apan usahay may pipila ka situwasyon nga nanginahanglan ug linaing hudisyal nga hukom. Pananglitan, sa dihang ang Manasesnong si Zelopehad namatay nga ang nahibiling mga anak pulos mga babaye lamang, ang pangutana mitungha kon sila makadawat ba ug panulondon. Niana si Jehova nagpakanaog ug hukom nga nagsulbad niini nga kahimtang ug human niana kini nahimong usa ka lagda sa pagdumala sa samang mga situwasyon. (Num 27:1-11; 36:1-12; tan-awa usab ang Lev 24:10-16.) Sa susama, ang usa ka hudisyal nga hukom nga gihimo ni David bahin sa pagpahat sa mga inagaw sa gubat nahimong usa ka legal nga sumbanan.​—1Sa 30:23-25.

 Pinaagi sa pagklasipikar sa pipila ka komon apan hilabihan ka makadaot nga mga buhat ingong mga salaod nga takos sa kamatayon, ang hudisyal nga mga hukom nga gihatag sa Diyos nalahi taliwala sa mga balaod sa kontemporaryong mga nasod. Ang mga katawhan sa palibot nga mga nasod nakigbahin sa pakigsekso sa hayop, sodomiya, insesto o pag-unay, ug uban pang makaluod nga mga buhat nga makadaot sa mental, pisikal, ug espirituwal nga kahimsog. (Lev 18:6-30; 20:10-23) Busa, ang hudisyal nga mga hukom ni Jehova, kon sundon, magtuboy sa kahimtang sa nasod sa Israel. Uban sa panalangin ni Jehova, ang hugot nga pagsunod sa Israel sa iyang mga sugo mosangpot gayod sa dayag nga mga kaayohan, nga tungod niana ang ubang mga nasod makaingon: “Kining dako nga nasod sa walay duhaduha usa ka maalamon ug masinaboton nga katawhan.” (Deu 4:4-6) Sanglit kini sa pagkatinuod maoy panalangin ngadto sa Israel (Lev 25:​18, 19; Deu 4:1; 7:12-15; 30:16), dili ikatingala nga ang salmista miampo nga siya unta tudloan sa hudisyal nga mga hukom ni Jehova. (Sal 119:108) Siya nagpabili niini pag-ayo mao nga siya midayeg kang Jehova pito ka beses sa usa ka adlaw tungod sa iyang hudisyal nga mga hukom (Sal 119:164), gani siya mibangon sa tungang gabii aron pasalamatan ang Diyos tungod niini.​—Sal 119:62.

Hinunoa, bisan tuod maayo, matarong, ug balaan, ang hudisyal nga mga hukom sa Balaod nagsilbi lamang ingong magtutudlo nga nagtultol ngadto kang Kristo. Ang maong pakigsaad sa Balaod gipulihan sa bag-ong pakigsaad. (Rom 7:12; Gal 3:24; Heb 8:7-13) Busa malaoman nga ang pagsunod sa kasugoan, o hudisyal nga mga hukom, nga nalangkit sa bag-ong pakigsaad mosangpot sa mas dako nga mga panalangin kay sa nasinati sa kinaiyanhong Israel ubos sa Balaod.​—Ju 13:​34, 35; 1Co 6:9-11; 1Pe 1:​14, 15, 22, 23; 2:​9, 10; 1Ju 5:3.