Usa ka tinukod nga pangunang gidisenyo alang sa (1) pagtunaw ug mga mineral, (2) pagtunaw sa kanhi tinunaw nga mga metal aron hulmahon o initon kini aron salsalon, ug (3) pagdangdang sa mga gamit nga kulonon ug sa  ubang mga butang nga seramik. Ang mga hudno sa kapanahonan sa Bibliya gitukod ginamit ang tisa o bato. Ang linginong mga hudno nga tumbaga nga gituohang sukad pa sa yugto sa mga Maghuhukom nakaplagan didto sa Tell Qasileh sa amihanang mga utlanan sa Tel Aviv-Yafo ug sa Tell Jemmeh (Tel Gamma), sa H sa Gaza. Kini nga mga hudno adunay dagkong mga panghaw nga gama sa lapok ug tisa nga gidisenyo sa pagpasulod ug hangin ngadto sa daobanan. Ang mga sudlanan nga gama sa yutang-kulonon nga gisudlan ug tumbaga ibutang sa ibabaw sa mga baldosa nga bato nga gipahimutang diha sa mga abo sa sinunog sa kalayo sa sulod sa hudno.

Ang tulo ka matinumanong Hebreohanon nga mga kauban ni Daniel gitambog ni Nabucodonosor ngadto sa usa ka nagkalayong hudno tungod sa pagdumili sa pagyukbo atubangan sa bulawang larawan nga gipatindog sa hari. (Dan 3) Kon kini ba maoy usa ka linain nga hudno nga gitukod alang sa maong katuyoan o kaha usa kini ka hudno nga sagad gigamit alang sa ubang naandang mga katuyoan, ang rekord wala mag-asoy.

Ang terminong “hudno” mahimong gamiton usab sa pagtumong sa usa ka hurnohan sa tinapay.​—Os 7:4; Lev 2:4.

Sa mahulagwayong paagi, ang Ehipto, nga nagsakop sa Israel sa mapig-otong yugo sa pagkaulipon, gipakasama sa usa ka hudno nga puthaw. (Deu 4:20) Dugang pa, ang pagbubo sa kasuko sa Diyos diha sa balay sa Israel gipakasama sa pagtunaw sa metal diha sa usa ka hudno. (Eze 22:18-22) Alang sa ubang mga gamit sa pulong ingong pagtandi o ilustrasyon, tan-awa ang Proverbio 17:3; 27:21; Salmo 12:6 (“tunawanang hudno”).​—Tan-awa ang TAPAHAN; HURNOHAN; PAGDALISAY, TIGDALISAY.