Usa ka anak nga lalaki ni Aram. (Gen 10:23) Apan sa 1 Cronicas 1:17, si Hul mopatim-awng gitala ingong anak nga lalaki ni Sem. Diha sa Alexandrine Manuscript ug sa Hebreohanong manuskrito nga Kennicott 175, ang 1 Cronicas 1:17 mabasa nga sama sa Genesis 10:​23, nga adunay prase nga “ug ang mga anak nga lalaki ni Aram” sa wala pa itala si Uz, Hul, Geter, ug Mas. Busa, ang pagkawala sa mga pulong “ug ang mga anak nga lalaki ni Aram” sa 1 Cronicas 1:17 diha sa Masoretikong teksto lagmit maoy tungod sa sayop sa magkokopya. Apan mahimo nga dili ingon niana ang nahitabo; sa Kasulatan, ang “mga anak nga lalaki” mahimong maglakip usab sa mga apo ug bisan sa mas ulahing mga kaliwat. (Alang sa posibleng pagtandi, tan-awa ang 1Cr 1:​4, diin si Sem, Ham, ug Japet wala ipaila nga mga anak ni Noe, tingali tungod sa kailado sa ilang relasyon kang Noe gibati sa orihinal nga magsusulat nga dili na kinahanglan ang maong pagpaila.)

Ang dapit nga gipuy-an sa mga kaliwat ni Hul wala sa tino mahibaloi. Gituohan ni Josephus nga si Hul (Urus) mao ang magtutukod sa Armenia. (Jewish Antiquities, I, 145 [vi, 4]) Ang uban nagsugyot ug mga dapit sa Mesopotamia ug sa uban pa. Daghan ang mopabor sa rehiyon sa Hula duol sa katubigan sa Merom diha sa Bibliya nga nahimutang sa A sa Dagat sa Galilea, sanglit ang ngalang Hul daw napreserbar diha sa ngalang “Hula” ug usab sa ngalang “Ulatha,” usa ka rehiyon nga gihisgotan ni Josephus.​—Jewish Antiquities, XV, 360 (x, 3).