[ang feminine sa Heled, nga nagkahulogang “Gidugayon sa Kinabuhi; Sistema sa mga Butang”; o, lagmit, “Ilagang Tigkubkob”].

Ang asawa ni Salum; usa ka babayeng manalagna nga nagpuyo sa Jerusalem sa panahon sa pagmando sa matinumanong si Haring Josias sa Juda.

Sa dihang nadungog ni Josias ang mga pulong sa “basahon sa balaod” nga nakaplagan ni Hilkias nga hataas nga saserdote sa panahon sa pag-ayo sa templo, siya nagpadalag mga delegado aron sa pagpakisayod kang Jehova. Sila miadto kang Hulda, kinsa sa baylo, nagpadangat sa pulong ni Jehova, nga nagpakita nga ang tanang katalagman nga gitala diha sa “basahon” modangat sa apostatang nasod gumikan sa pagkadili-masinugtanon. Si Hulda midugang nga si Josias, tungod kay nagpaubos sa iyang kaugalingon atubangan kang Jehova, dili makakita sa katalagman apan pagatigomon ngadto sa iyang mga katigulangan ug pagadad-on ngadto sa iyang lubnganan diha sa kalinaw.​—2Ha 22:8-20; 2Cr 34:14-28.

Ang uban naghunahuna nga sayop ang tagna ni Hulda tungod kay namatay si Josias diha sa wala kinahanglana nga pakiggubat. (2Ha 23:28-30) Ugaling, ang “kalinaw” diin si Josias pagatigomon ngadto sa iyang lubnganan dayag nga kasukwahi sa “katalagman” nga gitakdang modangat sa Juda. (2Ha 22:20; 2Cr 34:28) Si Josias namatay sa wala pa moabot ang maong katalagman niadtong 609-607 W.K.P., sa dihang gilikosan ug gilaglag sa mga Babilonyanhon ang Jerusalem. Dugang pa, ang ekspresyon nga ‘pagatigomon ngadto sa mga katigulangan sa usa’ wala gayod magkahulogan nga dili lakip niini ang pagkahiagom sa mapintas nga kamatayon diha sa panaggubat sanglit gigamit man usab ang susamang ekspresyon nga ‘matulog uban sa mga katigulangan sa usa’ nga nagtumong sa pagkamatay diha sa panaggubat ingon man sa dili mapintas nga kamatayon.​—Itandi ang Deu 31:16; 1Ha 2:10; 22:​34, 40.