1. Usa ka kaliwat ni Juda; anak nga lalaki ni Caleb ug Eprat; apohan sa artesano nga si Bezalel. Ang pipila sa mga kaliwat ni Hur hayan namuyo sa Betlehem. (Ex 31:2; 35:30; 38:22; 1Cr 2:​19, 20, 50, 51, 54; 4:1-4; 2Cr 1:5) Lagmit siya mao usab ang Num. 2.

2. Usa ka ilado nga kauban ni Moises ug Aaron. Wala madugay human mobiya sa Ehipto, sa dihang ang Israel gisulong sa mga Amalekanhon, si Hur mikuyog kang Moises ug Aaron ngadto sa tumoy sa bungtod diin siya ug si Aaron nagsangga sa mga kamot ni Moises hangtod nga gihatag ni Jehova ang kadaogan sa Israel batok sa mga Amalekanhon. (Ex 17:8-13) Wala madugay human niadto, sa usa ka higayon nga si Moises ug Josue mitungas sa Bukid sa Sinai aron modawat pa ug dugang sa Balaod, ang pagdumala sa kampo gitugyan kang Hur ug Aaron. (Ex 24:12-14) Lagmit siya mao usab ang Hur (Num. 1) nga apohan sa artesano sa tabernakulo nga si Bezalel. Si Josephus misulat nga si Hur mao ang bana ni Miriam, apan ang Bibliya walay gisulti nga bisan unsa mahitungod niini.​—Jewish Antiquities, III, 54 (ii, 4).

3. Usa ka hari sa Midian, usa sa lima ka hari nga gigamhan sa Amorihanon nga si Haring Sihon hangtod nga ang Israel, nga nagpaingon sa Yutang Saad, nagpildi kang Sihon. (Jos 13:​15, 16, 21; Num 21:21-24) Human niadto, tatawng si Hur ug ang iyang upat ka katagilungsod nakig-abin sa hari sa Moab nga si Balak batok sa Israel. (Num 22:1-7) Sa ulahi, ingon sa gisugo ni Jehova, ang mga Israelinhon nakiggubat sa mga Midianhon ug nagpatay kang Hur ingon man sa iyang upat ka alyadong hari nga Midianhon ug sa hakog nga manalagnang si Balaam.​—Num 31:1-8.

 4. Amahan sa luyoluyo nga tagdumala sa pagkaon ni Solomon sa bukirong rehiyon sa Epraim.​—1Ha 4:​7, 8.

5. Amahan ni Repaias. Ang anak nga lalaki ni Hur nga si Repaias mitabang kang Nehemias sa pagtukod pag-usab sa paril sa Jerusalem.​—Neh 3:9.