[Heb., choʹledh].

Usa ka ilaga nga 15 hangtod sa 30 sm (6 hangtod sa 12 pul.) ang gitas-on. Ang ilagang tigkubkob o mole rat (Spalax ehrenbergi) mugbog tiil, walay ikog, ug walay liog, pormag silindro ang lawas nga may humokon ug labong nga balhibo, nga sagad dalagon nga abohong-kape ang bulok. Ang ulo daling makita tungod sa walay balhibo nga simod ug sa duha ka paris sa dagkong nagsiwil nga mga ngipon. Ilalom sa Balaod, ang ilagang tigkubkob maoy mahugaw nga pagkaon.​—Lev 11:29.

Bisan tuod daghang hubad ang naghubad sa choʹledh nga “comadreja” (AS, KJ, RS), adunay pasukaranan sa paghubad niini ingong “ilagang tigkubkob.” Sa Arabiko, usa ka pinulongang kaamgid sa Hebreohanon, ang usa ka susama kaayong pulong, khuld, nagkahulogang “ilagang tigkubkob.” Dugang pa, ang choʹledh mahimong kaamgid sa usa ka Hebreohanong termino human sa kapanahonan sa Bibliya nga nagkahulogang “pagkubkob” o “paglungag.” Kini mohaom sa kinaiyang pagpangubkob sa ilagang tigkubkob.

Ang mga ilagang tigkubkob mopuyo ilalom sa yuta ug mokubkob ug mga katulganan ug dagkong mga tipiganan ilalom sa yuta. Kini nga mga  linalang mabuhi pinaagig mga tanom, nga sa panguna pinaagig mga lagutmon. Busa kini sila lahi sa tinuod nga mga mole (usa usab ka hayop nga tigkubkob), nga mokaon ug mga insekto ug mga wati ug wala isipa nga lumad sa Palestina.