Mopatim-aw nga ang Hebreohanong pulong nga nes nagpasabot sa usa ka permanenteng tukon o estaka nga nahimutang sa usa ka bantaawng dapit; kini gigamit sa literal ug sa mahulagwayong paagi. Busa, wala kini magpasabot sa usa ka timaan aron sa pagpadalag mga mensahe, sama sa usa ka “timailhang aso” (Huk 20:​38, 40) o usa ka “kalayo nga timaan” (Jer 6:1), nga niini laing mga pulong nga Hebreohanon ang gigamit. Hinunoa, kini nga tukon magsilbing dapit nga tagboanan aron ang katawhan o kasundalohan magtigom. (Isa 5:26; 13:2; 18:3; 30:17; 31:9; Jer 4:​6, 21; 50:2; 51:​12, 27; itandi ang Sal 60:​4, ftn sa Rbi8.) Pananglitan: Sa dihang ang mga Israelinhon sa usa ka higayon nagreklamo bahin sa mana ug sa pagkawalay tubig, si Jehova nagsilot kanila pinaagi sa pagpadala ug mga halas nga malala taliwala kanila. Human magpakitag paghinulsol ang mga Israelinhon, si Jehova nagsugo kang Moises sa paglilok ug halas ug ibutang kini sa usa ka ilhanang tukon (nes). “Dihadiha si Moises mihimog halas nga tumbaga ug gibutang kini sa ilhanang tukon; ug nahitabo nga kon ang usa ka halas makapaak kang bisan kinsa ug siya mosud-ong sa halas nga tumbaga, siya magpabiling buhi.” (Num 21:5-9) Dayag nga kining ilhanang tukon nahimutang sa usa ka tinong lokasyon ug walay duhaduha nga diha sa usa ka bantaawng dapit aron kini makita sa mga Israelinhon nga napaakan sa mga halas.

Sa susama, niadtong 537 W.K.P., ang Jerusalem, nga ang pagtukod pag-usab niini gitagna, nahimong timaan nga nag-aghat sa Hudiyong nahibilin sa pagbiya sa kayutaan diin sila natibulaag ug sa pagbalik ngadto sa kanhing biniyaan nga Jerusalem aron tukoron pag-usab ang templo. (Isa 11:​11, 12; itandi ang Isa 49:22; 62:​10, 11.) Hinunoa, ang kapadapatan sa maong tagna dili lamang sa ikaunom nga siglo. Ang Isaias 11:10 mabasa: “Ug mahitabo nianang adlawa nga aduna unyay gamot ni Jese nga mobarog ingon nga usa ka timaan alang sa mga katawhan.” Gipadapat ni apostol Pablo kini nga mga pulong ngadto kang Kristo Jesus, ang usa nga magamando sa mga nasod. (Rom 15:​8, 12) Dugang pa, gipaila ni Jesus ang iyang kaugalingon ingong ‘ang gamot ni David’ nga anak ni  Jese. (Pin 22:16) Busa, ang timaan mao si Kristo Jesus ingong nagmandong Hari nga nagbarog sa langitnong Bukid sa Zion.​—Itandi ang Heb 12:22; Pin 14:1.