ANG mga Medianhon ug mga Persianhon kanunayng gihisgotan sa Kasulatan tungod kay ilang giimplementar ang usa ka polisa nga nagtugot sa relihiyon ug pinaagi niini natuman ang tagna sa Bibliya.

Gitugotan ni Jehova nga ang mga Hudiyo mabihag sa Babilonya, usa ka nasod nga dili mobuhi ug mga binihag nga katawhan. Bisan pa niana, gitagna usab sa Diyos nga ipasig-uli ang mga Hudiyo ngadto sa ilang yutang natawhan. (Jer 27:22; 30:3) Ang Medo-Persia, nga simbolikong gihisgotan sa Bibliya ingong usa ka oso (Dan 7:5), nag-alagad sa katuyoan ni Jehova niining bahina.

Wala madugay human sa pagkapukan sa Babilonya, gimando sa Persianhon nga si Haring Ciro nga ang kanhing binihag nga mga Hudiyo makabalik sa ilang yutang natawhan ug tukoron pag-usab ang templo ni Jehova. (Esd 1:2-4) Sa ulahi kini nga mando gituman ni Dario I. (Esd 6:1-11) Si Haring Ahasuero (dayag nga si Jerjes I), sa dihang bug-os nga gipahibalo, naglagda ug usa ka mando nga nagpakgang sa usa ka daotang laraw sa pagpuo sa mga Hudiyo. (Est 7:3–​8:14) Niadtong 455 W.K.P., si Haring Artajerjes Longimanus naghatag ug pagtugot kang Nehemias sa pagtukod pag-usab sa mga paril sa Jerusalem, sa ingon nagsugod ang matagnaon nga pag-ihap sa pagtungha sa Mesiyas.​—Neh 2:3-8; Dan 9:25.