Mga butang nga giilog gikan sa napilding kaaway ug sagad napanag-iya sa mga mananaog sa gubat o, usahay, kanang nailog sa mga bandido o mga tulisan. (Luc 11:​21, 22) Bisan tuod ang Israel nagkuha ug mga inagaw diha sa ilang mga kadaogan, ang pagbaton ug mga inagaw dili mao ang motibo sa ilang mga pakiggubat, kondili kini maoy bahin sa ganti ni Jehova kanila tungod sa pagtuman sa iyang kabubut-on, ingon nga iyang mga tigpahamtang ug silot.

Si Abraham, sa dihang iyang giluwas si Lot gikan sa kasundalohan ni Kedorlaomer, midumili sa pagdawat ug mga inagaw alang sa iyang kaugalingon gikan sa hari sa Sodoma, aron walay usa nga makaingon nga si Kedorlaomer, dili si Jehova, ang nagpadato kang Abraham.​—Gen 14:1-24; Heb 7:4.

Ang Pagbahinbahin sa mga Inagaw. Sa dihang gipanimaslan ang mga Midianhon tungod kay sila ang hinungdan sa pagkasala ug pagkalaglag sa kadaghanan sa Israel (Num 25), daghang inagaw ang gikuha. Kini gibahinbahin mao nga ang 12,000 nga nakiggubat nakadawat ug katunga, ug ang laing katunga nadawat niadtong mga nagpabilin sa balay. Unya usa ka bahin sa 500 gikan sa pahat sa mga nakiggubat nga mga lalaki ang gihatag ngadto sa mga saserdote, ug usa ka bahin sa 50 sa laing katunga ang gihatag ngadto sa mga Levihanon. Ang mga sundalo kinabubut-ong naghatag ug daghang inagaw nga bulawan, ilabina ang alahas ug mga pahiyas, ngadto sa sangtuwaryo agig pasalamat sa panalipod ni Jehova sa ilang pagpakiggubat, nga niana sila wala mawad-i bisag usa ka tawo.​—Num 31:3-5, 21-54.

Kini nga paagi lagmit wala na sunda sa ulahi, apan mopatim-awng kini ang nahimong kinatibuk-ang basehan sa pagbahin sa mga inagaw. (1Sa 30:16-20, 22-25; Sal 68:12) Sa ulahi, ilalom sa gingharian, ang usa ka bahin sa inagaw gigahin alang sa hari o alang sa sangtuwaryo.​—2Sa 8:​7, 8, 11, 12; 2Ha 14:14; 1Cr 18:​7, 11.

Sa Dihang Gisakop ang Canaan. Ang mga siyudad sa pito ka nasod sa Canaan igatugyan sa kalaglagan; ang tanang mga molupyo pagapatyon; ang mga hayop lamang ug ang uban pang mga butang ang mahimong dad-on. (Deu 20:16-18; 7:​1, 2; Jos 11:14) Ingong unang bunga sa pagsakop sa Canaan, ang Jerico nalahi; ang mga metal lamang ang gitipigan ug gitugyan ngadto sa sangtuwaryo. (Jos 6:​21, 24) Ang panimalay ni Rahab naluwas tungod sa iyang pagtuo. (Jos 6:25) Sa mga siyudad nga iya sa katawhan sa ubang kanasoran, kon kini kinahanglang ilogon pinaagig pagpakiggubat, ang ulay nga mga babaye ug mga bata dili patyon. (Deu 20:10-15) Ang tanang inagaw nga mga manggad o ubang mga butang kinahanglang hinloan: Kon kini panapton, panit, o kahoy, kini labhan o hugasan; kon metal, kini kinahanglang ipaagi sa kalayo.​—Num 31:20-23.

Apostatang mga Siyudad. Ang mga siyudad sa Israel nga nahimong apostata kinahanglang bug-os nga laglagon uban sa tanang molupyo niini, ang mga inagaw sunogon didto sa plasa, ug ang siyudad pasagdan nga mahimong “tapok sa mga ginun-ob hangtod sa panahong walay tino.”​—Deu 13:12-17.

Giagawan ni Kristo ang Balay ni Satanas. Sa dinhi pa sa yuta, ‘giagawan’ ni Jesu-Kristo ang balay ni Satanas pinaagi sa pagpagawas niadtong naulipon sa mga demonyo, nga nag-ayo sa mga sakit nga gipadangat sa mga demonyo ngadto kanila. (Mat 12:22-29) Dugang pa, “sa dihang siya misaka sa itaas siya nagdala ug mga binihag; siya mihatag ug mga gasa [nga] mga lalaki.” Kini sila iyang gikuha gikan sa pagkontrolar ni Satanas ingong mga gasa alang sa pagpalig-on sa iyang kongregasyon.​—Efe 4:​8, 11, 12.

Bakak nga Relihiyosong mga Mangangagaw. Gipahayag ni Kristo nga ang mga eskriba ug mga Pariseo maoy samag mga tulisan, “puno sa inagaw,” nga dayag nga nabatonan pinaagig pagpangilkil gikan sa mga babayeng balo ug sa uban pang makaluluoy nga mga tawo; ug usab tungod kay ang katawhan ilang giulipon sa relihiyon pinaagi sa pagkuha sa “yawi sa kahibalo.” (Mat 23:25; Luc 11:52) Ang relihiyosong mga lider sa mga Hudiyo ilado usab sa pagpangagaw sa mga kabtangan sa mga Kristohanon.​—Heb 10:34.