Ang eksaktong dapit nga gitawag sa ngalang “India” diha sa Bibliya dili matino. (Est 8:9) Ang mga eskolar sa katibuk-an nagsugyot nga kini nagtumong sa dapit nga giagosan sa Suba sa Indus ug sa mga sapa nga nagaagos niini, nga mao, ang rehiyon sa Punjab ug lagmit usab ang Sind. Ang pamatuod sa historyador nga si Herodotus (III, 88, 94; IV, 44) nagpakita nga ang “India” unang nahimong bahin sa Imperyo sa Persia sa panahon sa pagmando ni Dario Hystaspis (521-486 W.K.P.). Sa panahon ni Ahasuero (giisip nga mao si Jerjes I, anak nga lalaki ni Dario Hystaspis), ang India mao ang sidlakang utlanan sa imperyo.​—Est 1:1.

Ang Walog sa Indus lagmit nga gipuy-an wala madugay human malahugay ang pinulongan sa mga magtutukod sa Babel. Ang usa ka pagtandi sa karaang sibilisasyon sa Walog sa Indus ug sa sibilisasyon sa Mesopotamia nagpadayag sa pagtukod ug mga estruktura nga sama sa mga plataporma nga ziggurat sa Mesopotamia, mga eskultora sa larawan sa tawo nga may mga ulo nga morag nagmaskara nga sama nianang sa karaang eskultora sa Mesopotamia, ug mga simbolong hulagway nga amgid sa unang mga hulagway sa Mesopotamia. Ang Asiryologo nga si Samuel N. Kramer nagsugyot nga ang Walog sa Indus gipuy-an sa mga tawo nga mikalagiw gikan sa Mesopotamia sa dihang ang mga Sumerianhon migahom sa maong dapit.