[lagmit, Ugang Dapit sa Gilead].

Usa ka karaang lungsod diha sa tribonhong teritoryo sa Gad, sa S sa Jordan. Ang tukmang nahimutangan niini dili matino, bisan tuod nga gituohan sa kadaghanang eskolar nga kini nahimutang sa S ug diyutay sa Jordan duol sa Wadi Yabis (Jabes), mga 35 km (22 mi) sa H sa Dagat sa Galilea.

Ang Jabes-gilead unang gihisgotan sa mga adlaw sa mga Maghuhukom maylabot sa panimalos nga gipahamtang ngadto sa silingang tribo ni Benjamin tungod sa pagkonsentir niini sa grabeng imoralidad. (Huk 21:8) Sa maong panahon sa dihang halos mapuo na sa mga Israelinhon ang tibuok tribo ni Benjamin (600 ka lalaki lamang ang nakaikyas), nakaplagan nga walay usa ka tawo sa Jabes-gilead ang miduyog sa pagpahamtang niining makataronganong silot. Busa gihukman nga patyon ang tanang lalaki, babaye, ug bata sa Jabes-gilead, walay labot ang mga ulay. Sa ingon, ang 400 ka ulay nga wala patya niadtong higayona gihatag ingong mga asawa ngadto sa kagiw nga mga Benjaminhon aron dili mapuo ang maong tribo.​—Huk 20:1–​21:14.

Mga tulo ka siglo sa ulahi, sa dihang ang tibuok Israel nangayo ug usa ka makitang hari sama sa nabatonan sa ubang mga nasod, ang mga Ammonhanon naghulga nga lugiton ang tuong mata sa tanang lalaki nga molupyo sa Jabes-gilead, usa ka hulga nga nahunong lamang sa dihang si Saul nagtigom ug kasundalohan nga 330,000 ug nagpakalagiw sa mga Ammonhanon. (1Sa 11:1-15) Kap-atan ka tuig sa ulahi gipildi sa mga Filistehanon ang mga Israelinhon ug gibitay ang gipunggotan ug ulo nga mga lawas ni Saul ug sa iyang tulo ka anak nga lalaki diha sa paril sa plasa sa sulod sa Bet-san. Sa pagkadungog niini nga kaulawan, ang maisog nga mga tawo sa Jabes-gilead nangahas sa pagsulong panahon sa kagabhion diin ilang gikuha ang mga patayng lawas, gidala kini ngadto sa Jabes-gilead, gisunog kini, ug ang mga bukog gilubong sa dungganong paagi. Unya sila nagpuasa sulod sa pito ka adlaw.​—1Sa 31:8-13; 1Cr 10:8-12.

Si David, ingong bag-ong dinihogan nga hari sa Juda, nagpadalag mga pasalamat ug mga panalangin ngadto sa mga lungsoranon sa Jabes-gilead tungod sa pagpakitag mahigugmaong-kalulot niining paagiha ngadto sa namatay nga dinihogang hari sa Israel. (2Sa 2:4-7) Sa ulahi, gisugo ni David nga dad-on ang mga bukog ni Saul ug Jonatan gikan sa Jabes-gilead ug ilubong kini sa lubnganan sa banay ni Saul didto sa teritoryo sa Benjamin.​—2Sa 21:12-14.