Usa ka siyudad sa S sa Jordan ug lagmit nga nahimutang sa A sa Arnon. Lagmit nga nailog kini ni Haring Sihon nga Amorihanon gikan sa mga Moabihanon. (Num 21:23-26) Sa Jahaz, gipildi sa mga Israelinhon ang kasundalohan ni Sihon, ug ang siyudad napanag-iya sa mga Rubenhon. (Deu 2:​32, 33; Jos 13:​15, 18, 23; Huk 11:​20, 21) Human niadto ang Jahaz gitudlo ingong usa ka Levihanong siyudad alang sa mga Merarihanon. (Jos 21:​34, 36) Sa ulahing kasaysayan sa Israel ang siyudad gigamhan sa mga Moabihanon. Diha sa Bato sa Moab, si Haring Mesa nanghambog nga nailog niya ang Jahaz gikan sa hari sa Israel pinaagi sa 200 ka manggugubat. Labot pa, ang mga manalagnang si Isaias ug Jeremias naghisgot niini nga siyudad diha sa mga pahayag batok sa Moab.​—Isa 15:​1, 4; Jer 48:​1, 34.

Bisan tuod nga ang mga eskolar nagsugyot ug ubay-ubayng mga dapit nga posibleng nahimutangan sa karaang Jahaz, ang tinong nahimutangan niini nagpabiling wala mahibaloi.