Duha ka Hebreohanong ngalan nga managlahi ang espeling ug kahulogan, apan usa lang ang katumbas nga espeling sa Cebuano.

[1, 2: Heb., Yedha·yahʹ]

1. Usa ka Simeonhon kansang kaliwat nga si Ziza maoy usa ka pangulo sa dihang nagmando si Ezequias.​—1Cr 4:​24, 37, 38, 41.

2. Usa ka pumoluyo sa Jerusalem human sa yugto sa pagkadestiyero kinsa nag-ayo sa usa ka bahin sa paril sa siyudad atubangan sa iyang balay; anak nga lalaki ni Harumap.​—Neh 3:10.

[3-8: Heb., Yedhaʽ·yahʹ, Si Jah Nahibalo]

3. Usa ka balay o banay sa mga saserdote nga kaliwat sa amahan nga gipili pinaagig ripa alang sa ika-2 sa 24 ka grupo nga niini gibahin ni David ang pagkasaserdote.​—1Cr 24:​1, 6, 7.

Ang mosunod nga gihisgotan mao ang ubay-ubayng mga saserdote human sa yugto sa pagkadestiyero nga ginganlan usab ug Jedaia, nga ang pipila kanila lagmit maoy mga membro sa samang banay sa amahan, apan lisod kining matino.

4. Usa ka saserdote, o lagmit mga membro sa nahisgotan na nga banay sa amahan, kinsa mipuyo sa Jerusalem human mobalik gikan sa Babilonya. Ang pagtawag kang Jedaia nga “anak nga lalaki  ni” Joiarib sa Nehemias 11:10 tingali maoy usa ka pagdugang sa magkokopya, ingon sa makita pinaagi sa pagtandi niini sa 1 Cronicas 9:10. Diha sa sinugdanan sa mga talaan sa Nehemias ug sa Mga Cronicas, si Jedaia ug ang laing duha pa (si Joiarib o Jehoiarib ug Jakin) maoy sama ra nga mga ngalan niadtong sa mga banay sa amahan sa panahon ni David. (1Cr 24:​6, 7, 17) Busa kini mahimong naghisgot lamang sa mga banay sa amahan, nga nagpakitang adunay naghawas kanila, samtang ang misunod nga mga ngalan tingali maoy sa mga indibiduwal; o lagmit ang tanang ngalan maoy sa mga indibiduwal nga buhi niadtong panahona.​—1Cr 9:10-12; Neh 11:​10-13.

5. Katigulangan sa 973 ka saserdote kinsa mibalik gikan sa Babilonya uban kang Zorobabel. (Esd 2:​1, 2, 36; Neh 7:39) Lagmit kini sila maoy mga membro sa mao rang banay sa amahan (Num. 3), gawas kon ang ilang pagkahimong sakop “sa balay ni Jesua” nagpasabot nga sila adunay kalangkitan sa linya sa hataas nga mga saserdote.

6, 7. Duha ka saserdote nga nagbaton niining ngalana ang gilakip sa talaan niadtong namalik uban kang Jesua ug Zorobabel niadtong 537 W.K.P. (Neh 12:​1, 6, 7) Sa panahon sa pagkasaserdote ni Joiakim nga manununod ni Jesua, ang matag usa gitumong ingong usa ka banay sa amahan, nga ang usa gihawasan ni Uzi ug ang lain gihawasan ni Netanel. (Neh 12:​12, 19, 21) Dili matino kon hain kanila o kini bang duha ka Jedaia nalangkit sa orihinal nga banay sa amahan (Num. 3).

8. Usa sa mibalik nga mga destiyero diin gikan kanila gikuha ang bulawan ug plata ug gihimong usa ka purongpurong alang sa Hataas nga Saserdoteng si Josue. (Zac 6:10-14) Wala ipaila sa espesipiko ang kalangkitan niya sa mga saserdote nga nahisgotan na.