[Hinaot Makahupot si Jehova; Nakahupot si Jehova].

1. Lain nga porma sa ngalan ni Ahazias, kinsa mipuli sa iyang amahan nga si Jehoram ingong hari sa Juda sa ulahing bahin sa ikanapulong siglo W.K.P. (2Cr 21:​16, 17; 22:1) Niini nga porma, nga makaplagan usab sa Masoretikong teksto sa 2 Cronicas 25:​23, gibalhin lamang ang orihinal nga Hebreohanong karakter sa ngalan sa Diyos aron mahimong prefix imbes nga suffix. Sa usa ka higayon kini nga hari sa Juda gitawag nga Azarias.​—2Cr 22:6b; tan-awa ang AHAZIAS Num. 2.

2. Anak nga lalaki ug manununod ni Haring Jehu ingong hari sa Israel. Si Jehoahaz naghari sulod sa 17 ka tuig, sukad sa 876 hangtod sa mga 860 W.K.P. (2Ha 10:35; 13:1) Sa dihang gipulihan niya sa trono ang iyang amahan, ang dakong bahin sa gingharian gikontrolar sa Siryanhon nga si Haring Hazael sa Damasco, kinsa nag-ilog gikan kang Jehu sa tibuok teritoryo sa Israel sa S sa Suba sa Jordan. (2Ha 10:32-34) Ug tungod kay si Jehoahaz nagbuhat man ug daotan sa mga mata ni Jehova, gitugotan sa Diyos si Hazael sa pagpadayon sa paglupig sa Israel sa tanang adlaw ni Jehoahaz, nga nagkunhod sa iyang mga manggugubat ngadto sa 50 na lamang ka mangangabayo, 10 ka karo, ug 10,000 ka tigbaktas nga mga sundalo. Sa kataposan, si Jehoahaz nangamuyo sa kaluoy ni Jehova, ug tungod sa pakigsaad kang Abraham, Isaac, ug Jacob, wala tugoti ni Jehova ang Sirya nga bug-os gun-obon ang Israel. (2Ha 13:2-7, 22, 23) Sa dihang si Jehoahaz namatay, siya gilubong sa Samaria ug gipulihan sa trono sa iyang anak nga lalaking si Jehoas.​—2Ha 13:​8, 9; 2Cr 25:17.

Ang pipila ka hubad, ingon man ang Masoretikong teksto, naggamit sa ngalan nga Joahaz diha sa 2 Hari 14:1.​—Tan-awa ang JOAHAZ Num. 1.

3. Anak nga lalaki ug manununod ni Josias ingong hari sa Juda. Ang ngalan sa iyang inahan maoy Hamutal. (2Ha 23:31) Si Esdras ug Jeremias, sumala sa pipila ka manuskrito, nagtawag kaniya nga Salum, nga gituohan sa pipila nga maoy iyang ngalan sa wala pa siya molingkod sa trono. (1Cr 3:15; Jer 22:11) Human mamatay ang iyang amahan sa mga kamot ni Paraon Neko sa Ehipto, si Jehoahaz (bisan dili mao ang kinamagulangan sa buhing mga anak nga lalaki ni Josias) dayag nga maoy gipili sa katawhan nga mopuli sa trono. (2Ha 23:​29, 30) Sa 2 Cronicas 36:​2, diin ang samang panghitabo gihisgotan, gigamit sa pipila ka hubad (AS, AT, JP, Ro) ang pinamubo nga pormang Joahaz alang sa Jehoahaz.​—Tan-awa ang JOAHAZ Num. 3.

Si Jehoahaz maoy 23 anyos sa dihang siya gihimong hari, ug siya nagmando nga dinaotan sulod sa tulo ka bulan sa unang bahin sa tuig 628 W.K.P., hangtod nga gibilanggo siya ni Paraon didto sa Ribla. Sa ulahi siya gidala ngadto sa Ehipto, diin siya namatay nga binihag, maingon sa gitagna ni manalagnang Jeremias.​—2Ha 23:31-34; Jer 22:10-12.