1. Hari sa Juda sulod sa 40 ka tuig, sukad sa 898 hangtod sa 859 W.K.P. Siya ang kinamanghorang anak nga lalaki ni Haring Ahazias sa Juda; ang iyang inahan mao si Zibia nga taga-Beer-seba.  (2Ha 12:1; 1Cr 3:11) Sa Masoretikong teksto ang iyang ngalan sagad nga gipamubo nga Joas.

Ang kamatayon ni Ahazias naghatag ug katarongan kang Atalia, ang daotang apohang babaye ni Jehoas, nga himoon ang iyang kaugalingon nga rayna. Apan aron mapugngan ang bisan kinsa sa umaabot nga ilogon ang trono gikan kaniya, gipatay niya ang tanang anak nga lalaki ni Ahazias gawas sa batang si Jehoas, kinsa niadtong panahona usa ka masuso nga wala pay usa ka tuig ang edad. Nakalingkawas siya sa pagpatay tungod kay ang iyang iyaan nga si Jehoseba, ang asawa sa Hataas nga Saserdoteng si Jehoiada, nagkuha kaniya ug sa iyang iwa ug gitagoan sila sa templo sulod sa unom ka tuig.​—2Ha 11:1-3; 2Cr 22:10-12.

Sa dihang ang bata nag-edad na ug pito ka tuig, si Jehoiada mitug-an sa iyang sekreto ngadto sa lima ka pangulo kang kinsa gibutyag niya sa unang higayon ang legal nga manununod sa trono. Unya ang 500 ka lalaki ilalom sa pagdumala niini nga mga pangulo gisangkapan ni Jehoiada sa mga taming ug mga hinagiban gikan sa templo ug gisugo sila sa pagbantay palibot kang Jehoas panahon sa seremonyas sa pagkorona diha sa sawang sa templo. Si bisan kinsa nga mosulay sa pagbabag pagapatyon. (2Ha 11:4-12, 21; 2Cr 23:1-11) Sa pagkadungog nga ang katawhan naninggit, si Atalia nagdali sa pag-adto, ug sa samang higayon nagsinggit, “Panagkunsabo! Panagkunsabo!” Gipagawas siya dihadiha, ug didto sa agianan pasulod sa ganghaan sa kabayo ilang gipatay siya. Unya si Jehoiada mihimog pakigsaad sa pagkamatinumanon tali kang Jehova, sa bag-ong gipahiluna nga hari, ug sa katawhan, ug human niana ilang gitumpag ang balay ni Baal ug gilaglag ang mga halaran ug mga imahen niini ug usab gipatay si Matan nga saserdote ni Baal.​—2Ha 11:13-20; 2Cr 23:12-21.

Human niadto, samtang ang Hataas nga Saserdoteng si Jehoiada buhi pa ug nag-alagad ingong amahan ug magtatambag ni Jehoas, ang batan-ong monarko miuswag. Si Jehoas naminyo sa dihang siya nag-edad ug 21, ug siya nakabaton ug duha ka asawa, usa kanila ginganlan ug Jehoadan, ug pinaagi kanila siya nanganak ug mga anak nga lalaki ug mga babaye. Pinaagi niini ang linya ni David nga motultol ngadto sa Mesiyas, nga hapit gayod maputol sa bug-os, sa makausa pa nalig-on pag-usab.​—2Ha 12:1-3; 2Cr 24:1-3; 25:1.

Ang balay ni Jehova gikinahanglan gayod nga ayohon dili lamang tungod sa kadugay na (niadtong tungora labing menos 150 ka tuig) kondili tungod usab kay gipasagdan ug gikawatan kini sa panahon sa pagmando ni Atalia. Tungod niana, giawhag ni Jehoas ang mga Levihanon sa pagpatunghag salapi alang sa pagpasig-uli pinaagi sa paglibot sa lainlaing mga siyudad sa tibuok Juda, apan ang sanong sa mga Levihanon dili kinasingkasing, ug wala mahimo ang buluhaton. (2Ha 12:​4-8; 2Cr 24:4-7) Sa ulahi ang mga kahikayan sa pagtigom ug sa pagdumala sa mga pondo giusab. Maayo ang pagsanong sa katawhan, ug ang buluhaton sa pag-ayo dali nga nahuman.​—2Ha 12:9-16; 2Cr 24:8-14.

Human sa kamatayon sa matinumanong Hataas nga Saserdoteng si Jehoiada sa edad nga 130, ang mga prinsipe sa gingharian inanay nga nagpaliso kang Haring Jehoas ug sa katawhan gikan kang Jehova ngadto sa pagsimba sa paganong mga idolo ug sa pormag kinatawo nga “sagradong mga haligi.” Ug sa dihang si Jehova nagpatindog ug mga manalagna aron sa pagpasidaan kanila, sila wala mamati. (2Cr 24:15-19) Si Jehoas nagpatay pa gani kang Zacarias, ang mismong anak nga lalaki ni Jehoiada, tungod kay pinaagi kaniya gisukmatan sila sa Diyos: “Nganong kamo naglapas sa mga sugo ni Jehova?” Ang mga pulong sa himalatyong si Zacarias mao kini: “Si Jehova magatan-aw unta niini ug magasingil niini.”​—2Cr 24:20-22.

Ang balos miabot sa wala madugay. Sanglit gikuha na ang panalipod ni Jehova, ang usa ka gamayng panon sa kasundalohan sa mga Siryanhon nga gipangunahan ni Hazael nakasulod sa teritoryo sa Juda, nga tungod niana napugos si Jehoas sa pagtugyan sa bulawan ug sa mga bahandi sa sangtuwaryo, ingon man sa iyang kaugalingong mga katigayonan, ug gibiyaan siya nga nagmagul-anon ug may balatian. (2Ha 12:​17, 18; 2Cr 24:23-25) Wala madugay human niana, duha sa iyang mga sulugoon ang nagkunsabo ug nagpatay kang Jehoas sa bata pang edad nga 47. Ilang gilubong siya sa Siyudad ni David uban sa iyang mga katigulangan, ug ang iyang anak nga lalaki nga si Amazias naghari puli kaniya.​—2Ha 12:19-21; 2Cr 24:25-27.

2. Hari sa Israel; anak nga lalaki ni Jehoahaz ug apo ni Jehu. Ang pinamubo sa iyang ngalan nga Joas makaplagan usab sa Masoretikong teksto. (Os 1:1; Am 1:1) Nagmando siya sulod sa 16 ka tuig sa tungatunga sa ikasiyam nga siglo W.K.P. Sa panahon sa unang bahin sa paghari niini nga Jehoas (anak nga lalaki ni Jehoahaz) sa amihanang gingharian sa Israel, si Jehoas nga anak nga lalaki ni Ahazias mao ang hari sa habagatang gingharian sa Juda.​—2Ha 13:10.

Sa kinatibuk-an gihimo ni Jehoas ang daotan sa mga mata ni Jehova ug gitugotan nga ang pagsimba sa nating baka magpadayon sa tibuok yuta. Bisan pa niana, sa dihang ang manalagnang si Eliseo nasakit ug hapit nang mamatay, si Jehoas miadto ug mihilak tungod kaniya, nga nag-ingon: “Amahan ko, amahan ko, ang karo nga iggugubat sa Israel ug ang iyang mga mangangabayo!” (2Ha 13:​11, 14) Sa pagsunod sa hangyo sa manalagna, gitira  ni Jehoas ang usa ka pana sa gawas sa bentana paingon sa Sirya ug unya gibunal ang iyang mga pana nganha sa yuta. Apan, siya nagbunal sa tulo ka higayon lamang. Nasuko si Eliseo tungod niini, kay kon nagpadayon pa unta siya sa pagbunal sa yuta sa makalima o sa makaunom, si Eliseo miingon, si Jehoas bug-os untang magmadaogon batok sa mga Siryanhon; apan karon, ang manalagna nagpahayag, siya makaangkon lamang ug tulo ka dili-bug-os nga kadaogan. (2Ha 13:15-19) Sa tulo ka pagpakiggubat ni Jehoas batok sa mga Siryanhon siya nagmalamposon, nga nagbawi sa ubay-ubayng siyudad sa Israel nga giilog sa amahan ni Ben-hadad nga si Hazael gikan sa amihanang gingharian.​—2Ha 13:​24, 25.

Gipasuholan usab ni Jehoas sa hari sa Juda ang usa ka gatos ka libo sa iyang tropa aron makig-away batok sa mga Edomhanon. Hinunoa, tungod sa tambag sa usa ka “tawo sa matuod nga Diyos” sila gipapauli, ug bisan pag sila gibayran nag usa ka gatos ka talanton nga plata ($660,600), sila nangasuko sa dihang gipapauli, lagmit tungod sa pagkawala sa gilaoman nilang bahin sa mga agawonon. Busa human sa ilang pagbalik sa A ilang giagawan ang mga lungsod sa habagatang gingharian, gikan sa Samaria (lagmit ang sukaranan sa ilang kalihokan) hangtod sa Bet-horon.​—2Cr 25:6-10, 13.

Tingali ingong balos tungod niini nga ang hari sa Juda naghagit kang Jehoas sa pagpakiggubat. Sa gubat nga misunod, si Haring Amazias sa Juda nadakpan didto sa Bet-semes, ug human niadto gibuslotan sa kasundalohan ni Jehoas ang paril sa Jerusalem, gikawatan ang templo ug ang balay sa hari sa bulawan ug plata niini ug nagdala ug mga binihag ngadto sa Samaria. (2Ha 14:8-14; 2Cr 25:17-24) Sa kataposan, si Jehoas namatay ug gilubong sa Samaria, ug ang iyang anak nga lalaki nga si Jeroboam II nagmando puli kaniya.​—2Ha 13:​12, 13; 14:​15, 16.