[Hinaot Masayod si Jehova].

1. Amahan ni Benaias nga halos kanunayng gipaila ingong “Benaias nga anak nga lalaki ni Jehoiada,” ug kinsa usa sa gamhanang mga tawo ni David ug usab pangulo sa kasundalohan ni Solomon. (2Sa 23:​8, 20, 22, 23; 1Ha 2:35) Si Jehoiada nalangkit sa pagkasaserdote sanglit gitawag siya nga “pangulong saserdote.” Gitawag siya ingong “ang pangulo sa mga anak nga lalaki ni Aaron” ug lakip siya niadtong mihugop ngadto kang David sa dihang nahimo kining hari ibabaw sa tibuok Israel didto sa Hebron.​—1Cr 27:5; 12:​27, 38.

2. Usa ka magtatambag ni Haring David; dayag nga usa ka apong lalaki sa Num. 1.​—1Cr 27:​33, 34.

3. Hataas nga saserdote sa panahon ni Jehoram, Ahazias, Atalia, ug Jehoas. Si Jehoiada naminyo sa anak nga babaye ni Haring Jehoram nga si Jehoseba, gitawag usab nga Jehosabet (ang bugtong natala nga hitabo nga ang usa ka saserdote naminyo sa harianong banay). Si Jehoiada nailhan ilabina sa pagpukan kang Atalia ug sa pagtuboy sa matuod nga pagsimba sa Juda. Human patya ang nagmandong anak ni Atalia nga si Ahazias, gipatay ni Atalia ang tanang nahibiling harianong kaliwat ug gipahiluna ang iyang kaugalingon sa trono. Apan, si Jehoseba nga igsoong babaye ni Ahazias bisan tuod dili mismo anak ni Atalia, nagkuha sa masusong anak nga lalaki ni Ahazias nga si Jehoas ug nagtago kaniya sulod sa unom ka tuig. Sa ikapito nga tuig, gikuha ni Jehoiada ang pagpaluyo sa mga Levihanon, sa mga pangulo sa Carianhong bantay ug sa mga magdadagan, ingon man sa mga pangulo sa mga balay sa amahan sa Israel. Unya  iyang gipagula si Jehoas, kinsa ilang giproklamar ingong hari. Unya gimando ni Jehoiada nga si Atalia dad-on sa gawas sa templo ug patyon.​—2Ha 11:1-16; 2Cr 22:10–​23:15.

Human niadto wala mag-usik ug panahon si Jehoiada sa pagpauswag sa pagsimba kang Jehova. Iyang gipasig-uli ang relasyon sa Israel nga may pakigsaad uban kang Jehova, nga tungod niana gigun-ob sa katawhan ang balay ni Baal ug gihanaw ang mga halaran, mga imahen, ug ang mga saserdote niini. Unya gipasig-uli ni Jehoiada ang tanang pag-alagad sa templo. Dako ang iyang impluwensiya alang sa ikaayo sa kinabuhi ni Jehoas. Si Jehoiada ug ang hari nag-ayo sa templo ug naghimog lainlaing mga galamiton alang sa balay ni Jehova. Sa dihang sa kataposan si Jehoiada namatay sa edad nga 130, gihatag kaniya ang talagsaong dungog sa paglubong uban sa mga hari “tungod kay siya nagbuhat ug maayo sa Israel ug sa matuod nga Diyos ug sa Iyang balay.” Ugaling lang, ang iyang maayong impluwensiya namatay uban kaniya, kay si Jehoas namati sa mga prinsipe sa Juda ug mitalikod kang Jehova, gani gimando pa niya nga patyon ang anak nga lalaki ni Jehoiada nga si Zacarias, kinsa mibadlong sa dili-matinumanong katawhan.​—2Ha 11:17–​12:16; 2Cr 23:16–​24:22.

4. Usa ka saserdote nga gipulihan ni Sofonias nga anak nga lalaki ni Maaseias sa panahon ni Jeremias.​—Jer 29:24-27.