[lagmit, Si Jehova Lig-ong Nagtukod].

Anak nga lalaki ni Haring Jehoiakim sa Juda pinaagi kang Nehusta. (2Ha 24:​6, 8; 2Cr 36:8) Gitawag usab siya nga Jeconias (laing porma sa Jehoiakin) ug Conias (pinamubo sa Jeconias).​—Est 2:6; Jer 28:4; 37:1.

Sa edad nga 18 si Jehoiakin nahimong hari ug nagpadayon sa daotang mga buhat sa iyang amahan. (2Ha 24:​8, 9; 2Cr 36:​9, ftn sa Rbi8) Ang amahan ni Jehoiakin nga si Jehoiakim nahimong sakop ni Haring Nabucodonosor sa Babilonya apan mirebelde sa ikatulo nga tuig sa iyang pagkabasalyo (618 W.K.P.). (2Ha 24:1) Kini misangpot sa paglikos sa Jerusalem. Ang mga pulong nga “nianang panahona” (2Ha 24:10) mahimong magtumong, dili sa hamubong yugto sa paghari ni Jehoiakin, kondili sa katibuk-ang yugto nga kini nahitabo, sa ingon posible ang pagsabot nga ang paglikos nagsugod sa panahon sa paghari sa iyang amahan nga si Jehoiakim, sumala sa gipakita sa Daniel 1:​1, 2. Mopatim-aw nga si Jehoiakim namatay sa panahon niini nga paglikos ug si Jehoiakin milingkod sa trono sa Juda. Apan, natapos ang iyang pagmando sa tulo ka bulan ug napulo ka adlaw lamang sa ulahi, sa dihang siya misurender kang Nabucodonosor niadtong 617 W.K.P. (sa bulan sa Adar, sumala sa usa ka Babilonyanhong asoy). (2Ha 24:​11, 12; 2Cr 36:9; Assyrian and Babylonian Chronicles, ni A. Grayson, 1975, p. 102) Ingong katumanan sa pulong ni Jehova pinaagi kang Jeremias, siya gidestiyero sa Babilonya. (Jer 22:24-27; 24:1; 27:​19, 20; 29:​1, 2) Ang ubang mga membro sa harianong panimalay, mga opisyal sa palasyo, mga artesano, ug mga manggugubat gidestiyero usab.​—2Ha 24:14-16; tan-awa ang NABUCODONOSOR.

Ang rekord sa 2 Hari 24:12-16 nag-ingon nga gidestiyero ni Nabucodonosor ang mga binihag ug gidala ang “tanang bahandi sa balay ni Jehova ug ang mga bahandi sa balay sa hari.” Ang asoy sa Daniel 1:​1, 2 naghisgot lamang ug “pipila sa mga  galamiton” nga gidala ngadto sa Babilonya. Ang rason niini lagmit mao nga ang mga bahandi nga gihisgotan sa Ikaduhang Hari naglakip lamang sa bulawan nga mga galamiton, nga maoy gipasiugda sa maong asoy, ug nga ang ubang mga galamiton gibilin. Ang laing posibilidad mao nga, sa dihang ang Jerusalem miangka na sa dihang gilikosan sa mga Babilonyanhon (nga nahitabo tungod sa pagrebelde ni Jehoiakim batok sa hari sa Babilonya), “ang pipila sa mga galamiton sa balay ni Jehova” gidala ngadto sa Babilonya, ug wala madugay sa ulahi, sa dihang si Jehoiakin mismo gibalhin ngadto sa Babilonya, ang ubang “tilinguhaong mga galamiton sa balay ni Jehova” gidala usab. Kini nga posibilidad gipakita sa asoy sa 2 Cronicas 36:6-10. Sumala sa asoy sa Mga Cronicas, mopatim-aw nga si Nabucodonosor, human sa malamposong pagdaog sa Jerusalem, mibiya apan unya “nagpasugo ug nagdala [kang Jehoiakin] ngadto sa Babilonya uban ang tilinguhaong mga butang sa balay ni Jehova.” Sa susamang paagi, napulo ka tuig sa ulahi, sa kataposang pagsakop ug paglaglag sa Jerusalem (607 W.K.P.), si Nabucodonosor mibiya paingon sa Ribla “sa yuta sa Hamat,” nga nagtugyan sa mga buluhatong pagahimoon pa human sa maong kadaogan ngadto sa iyang pangulo sa mga bantay nga si Nebuzaradan.​—2Ha 25:8-21.

Samtang didto sa Babilonya, si Jehoiakin nanganak ug pito ka anak nga lalaki. (1Cr 3:16-18) Niini nga paagi napreserbar ang linya sa kaliwat nga motultol ngadto sa Mesiyas. (Mat 1:​11, 12) Apan, ingon sa gipakita sa tagna, wala gayoy usa sa mga kaliwat ni Jehoiakin ang nagmando sa yutan-ong Jerusalem. Busa si Jehoiakin samag walay anak, nga walay kaliwat nga mipuli kaniya ingong hari.​—Jer 22:28-30.

Sa ikalima nga tuig sa pagkadestiyero ni Jehoiakin, si Ezequiel nagsugod sa iyang pagpanagna. (Eze 1:2) Mga 32 ka tuig sa ulahi, dayag nga niadtong 580 W.K.P., si Jehoiakin gipagawas gikan sa bilanggoan sa manununod ni Nabucodonosor nga si Evil-merodak (Awil-Marduk) ug gihatagan ug pinaborang posisyon ibabaw sa tanan nga ubang binihag nga mga hari. Human niadto siya mikaon diha sa lamesa ni Evil-merodak ug nakadawat ug adlaw-adlaw nga rasyon.​—2Ha 25:27-30; Jer 52:31-34.

Ang mga dokumento sa kagamhanan sa Babilonya nakaplagan nga nagtala sa mga rasyon alang kang Jehoiakin ug sa lima sa iyang mga anak nga lalaki.