[Si Jehova Andam (Hamili; Mahinatagon)], JONADAB [pinamubo sa Jehonadab].

Diha sa Hebreohanong teksto ug sa ubang Cebuano nga mga hubad, kining duha ka espeling gigamit nga baylobaylo alang sa matag usa sa duha ka tawo nga nagbaton niini nga ngalan.

1. Pag-umangkong lalaki ni David; anak sa iyang igsoong si Simea. Si Jehonadab maoy “maalamon kaayo nga tawo” apan malansison ug malalangon. Human aghata ang anak nga lalaki ni David nga si Amnon nga ibutyag ngadto kaniya ang iyang kaibog kang Tamar nga iyang igsoon sa amahan, gisugyot ni Jehonadab ang usa ka laraw nga tungod niana giamong-amongan ni Amnon si Tamar. Human si Amnon ipapatay ni Absalom nga pursosong igsoon ni Tamar agig panimalos, ang taho nakaabot kang David nga gipatay ni Absalom ang tanang anak nga lalaki sa hari, apan diha nianang tungora si Jehonadab nga nagpasalig nga si Amnon lamang ang namatay. (2Sa 13:3-5, 14, 22, 28-33) Lagmit siya mao ang “Jonatan” sa 2 Samuel 21:21 ug 1 Cronicas 20:7.

2. Anak nga lalaki ni Rekab; kauban ni Haring Jehu. Ang iyang pagkahibalag kang Jehu dili kay wala tuyoa, kay sa iyang kaugalingong kabubut-on si Jehonadab “miadto aron sa pagsugat kaniya,” ug sa baylo, siya nakadawat sa panalangin ni Jehu. Ang misunod nga mga panghitabo nagpakita nga si Jehonadab bug-os miuyon sa determinasyon ni Jehu sa pagpuo sa pagsimba kang Baal gikan sa Israel. Sa matag plano nga gihimo ni Jehu, si Jehonadab positibong misanong dayon. “Ang imo bang kasingkasing matul-id uban kanako?” Si Jehu nangutana. Siya mitubag, “Oo.” “Itunol kanako ang imong kamot,” si Jehu miingon; ug gitunol ni Jehonadab ang iyang kamot. Karon didto sa karo ni Jehu, gisultihan si Jehonadab, “Uban nako ug tan-awa ang dili nako pagtugot nga may makig-indig kang Jehova,” ug sa makausa pa siya nagpakitag pagkaandam. Sa kataposan, sa dihang sila nakaabot sa Samaria, ug ang tanang magsisimba ni Baal natigom na, si Jehonadab wala mobiya apan miuban kang Jehu sa sulod sa balay ni Baal ug nagpabilin sa iyang kiliran panahon sa pagpamatay nga nahitabo human niadto. Sa samang higayon gipasundayag ni Jehu ang iyang bug-os nga pagsalig ug kompiyansa kang Jehonadab.​—2Ha 10:15-28.

 Duolan sa 300 ka tuig sa ulahi, ang mga kaliwat ni Jehonadab, ang mga Rekabita, gigamit ni Jeremias ubos sa pagtultol ni Jehova ingong panig-ingnan sa pagkamatinumanon sa mga sugo sa ilang katigulangan, dili sama sa pagkamasinupakon ngadto sa Diyos nga gipakita sa katawhan sa Juda ug Jerusalem. Gisugo ni Jehonadab ang mga Rekabita nga magpuyo sa mga tolda, dili magpugas, dili magtanom ug mga parasan, ug dili moinom ug bino. Sa dihang gidalitan sila ni Jeremias ug bino, sila midumili, nga nahinumdom sa sugo sa ilang katigulangang si Jehonadab. Tungod sa maong pagkamatinumanon si Jehova misaad: “Dili mawad-an si Jonadab nga anak nga lalaki ni Rekab ug tawo nga mobarog kanunay sa akong atubangan.”​—Jer 35:1-19.