Kini nga ekspresyon nga makaplagan sa 285 ka higayon, nga may pipila ka kalainan diha sa Kasulatan, mao ang hubad sa Hebreohanong mga pulong nga Yeho·wahʹ tseva·ʼohthʹ. Ang basahon sa mga tagna, ilabina ang Isaias, Jeremias, ug Zacarias, naundan sa kadaghanan niini nga mga ekspresyon. Si Pablo ug Santiago, nga nagkutlo o naghisgot sa mga tagna, migamit ug katumbas niini nga ekspresyon (gihatagag katumbas nga espeling sa Grego) diha sa ilang mga sinulat.​—Rom 9:29; San 5:4; itandi ang Isa 1:9.

Ang Hebreohanong pulong nga tsa·vaʼʹ (singular; plural, tseva·ʼohthʹ) sa panguna nagkahulogang usa ka literal nga panon sa kasundalohan, o mga manggugubat, sama sa Genesis 21:22; Deuteronomio 20:​9, ug sa daghang uban pang mga teksto.  Apan, kini nga termino gigamit usab diha sa mahulagwayong diwa sama sa “ang mga langit ug ang yuta ug ang tibuok nilang panon,” o “ang adlaw ug ang bulan ug ang mga bituon, ang tibuok panon sa kalangitan.” (Gen 2:1; Deu 4:19) Ang plural nga porma (tseva·ʼohthʹ) gigamit sa makadaghan sa pagtumong sa Israelinhong kasundalohan, sama sa Exodo 6:26; 7:4; Numeros 33:1; Salmo 44:9; 60:10. Ang pipila ka eskolar nagtuo nga ang “mga panon” diha sa ekspresyon nga “Jehova sa mga panon” naglakip dili lamang sa mga panon sa mga manulonda kondili usab sa Israelinhong kasundalohan ug sa dili-buhing langitnong mga butang. Apan, mopatim-aw nga ang “mga panon” nga gipasabot, sa panguna, kon dili man eksklusibo, mao ang mga panon sa mga manulonda.

Sa dihang nakita ni Josue ang usa ka bisita nga manulonda duol sa Jerico ug nangutana kaniya kon siya ba dapig sa Israel o dapig sa kaaway, ang tubag maoy, “Dili, apan ako​—ingong prinsipe sa kasundalohan ni Jehova ako karon mianhi.” (Jos 5:13-15) Ang manalagnang si Micaias misulti kang Haring Ahab ug kang Haring Jehosapat, “Nakita ko gayod si Jehova nga naglingkod sa iyang trono ug ang tanang panon sa mga langit nagbarog tupad niya, sa iyang tuo ug sa iyang wala,” nga tin-awng nagtumong sa espiritung mga anak ni Jehova. (1Ha 22:19-21) Haom ang paggamit sa plural nga pormang “Jehova sa mga panon” sanglit ang mga panon sa mga manulonda gihubit dili lamang ingong mga dibisyon sa mga kerubin, mga serapin, ug mga manulonda (Isa 6:​2, 3; Gen 3:24; Pin 5:11) kondili gihubit usab ingong organisadong mga pundok, maong si Jesu-Kristo nakaingon nga adunay iyang masugo nga “kapin sa napulog-duha ka lehiyon sa mga manulonda.” (Mat 26:53) Sa dihang si Ezequias nangamuyo ug tabang kang Jehova siya mitawag kaniya nga “Jehova sa mga panon, ang Diyos sa Israel, nga naglingkod ibabaw sa mga kerubin,” nga dayag nga nagtumong sa arka sa pakigsaad ug sa mga larawan sa kerubin diha sa tabon niini, nga nagsimbolo sa langitnong trono ni Jehova. (Isa 37:16; itandi ang 1Sa 4:4; 2Sa 6:2.) Ang nahadlok nga alagad ni Eliseo gipasaligan pinaagig milagrosong panan-awon nga niana iyang nakita ang mga bukid palibot sa gilikosang siyudad sa pinuy-anan ni Eliseo nga “napuno sa mga kabayo ug sa mga karong iggugubat nga kalayo,” nga bahin sa mga panon sa mga manulonda ni Jehova.​—2Ha 6:15-17.

Busa, ang ekspresyon nga “Jehova sa mga panon” nagpasabot sa gahom, ang gahom nga gihuptan sa Soberanong Magmamando sa uniberso, kinsa nailalom sa iyang pagmando ang dagko kaayong mga panon sa espiritung mga linalang. (Sal 103:​20, 21; 148:​1, 2; Isa 1:24; Jer 32:​17, 18) Busa kini takos hatagan ug halalom nga pagtahod ug kataha, samtang sa samang higayon maoy usa ka tinubdan sa paghupay ug pagdasig alang sa mga alagad ni Jehova. Si David, nga nag-inusara ug wala tabangi sa bisan unsang yutan-ong kasundalohan, mihagit sa gikalisangan nga Filistehanong si Goliat, “sa ngalan ni Jehova sa mga panon, ang Diyos sa mga talay sa kasundalohan sa Israel.” (1Sa 17:45) Dili lamang sa mga panahon sa literal nga gubat kondili usab sa tanang uban pang masulayon nga mga kahimtang o mga okasyon nga mahinungdanon nga ang katawhan sa Diyos sa katibuk-an ug ingong mga indibiduwal makakuhag kalig-on ug paglaom gikan sa pag-ila sa kahalangdon sa soberanong posisyon ni Jehova, nga nabanaag sa iyang pagkontrolar sa gamhanang mga panon nga nag-alagad gikan sa iyang langitnong puloy-anan. (1Sa 1:9-11; 2Sa 6:18; 7:25-29) Ang paggamit sa mga manalagna sa ekspresyong “Jehova sa mga panon” maoy dugang pang katarongan nga kadtong namati sa mga tagna makatino sa katumanan niini.