[lagmit pinamubo sa Jehosue, nga nagkahulogang “Si Jehova Maoy Kaluwasan”].

1. Usa ka Aaronikong saserdote sa panahon ni David. Ang balay ni Jesua gitudlo ingong ika-9 sa 24 ka dibisyon sa Aaronikong pagkasaserdote sumala sa gihikay ni David. Lagmit nga kining balaya usab ang gitala nga lakip niadtong mibalik uban kang Zorobabel gikan sa pagkadestiyero sa Babilonya niadtong 537 W.K.P.​—1Cr 24:​1, 11, 31; Esd 2:​1, 36; Neh 7:39.

2. Usa sa mga Levihanon nga gitudlo sa pag-apod-apod sa mga ikapulo ug sa mga amot diha sa mga siyudad sa mga saserdote sa panahon sa paghari ni Haring Ezequias.​—2Cr 31:15.

3. Usa ka Israelinhon sa banay ni Pahat-moab, nga ang pipila sa iyang mga kaliwat mibalik gikan sa pagkadestiyero sa Babilonya uban kang Zorobabel.​—Esd 2:​1, 2, 6; Neh 7:11.

4. Usa ka hataas nga saserdote (gitawag ug Josue diha sa basahon ni Haggeo ug Zacarias), anak nga lalaki ni Jehozadak ug apo ni Seraias. (Esd 3:8; Neh 12:26; 1Cr 6:14) Siya maoy sakop sa balay ni Eleasar.​—Tan-awa ang Esd 7:1-5 alang sa talaan sa kagikan sukad kang Eleasar hangtod kang Seraias.

Sa dihang gilaglag ni Nabucodonosor ang Jerusalem, iyang gipatay si Seraias, kinsa mao ang hataas nga saserdote niadtong panahona, ug nagdala kang Jehozadak nga binihag ngadto sa Babilonya. (2Ha 25:18-21; 1Cr 6:​14, 15) Si Jesua mibalik gikan sa Babilonya niadtong 537 W.K.P. uban kang Zorobabel ug nag-alagad ingong hataas nga saserdote ngadto sa napasig-uling Hudiyo nga nahibilin. (Esd 2:2; 5:2; Neh 7:7; Hag 1:1) Busa gitipigan ni Jehova ang linya sa hataas nga pagkasaserdote, aron ang Israel may mga pag-alagad sa hataas nga mga saserdote sukad sa pagpasig-uli hangtod sa pag-abot sa Mesiyas. Si Jesua nanguna uban kang Zorobabel sa pagtukod sa halaran, ug dayon sa pagtukod pag-usab sa templo, nga gidasig ni manalagnang Haggeo ug Zacarias. (Esd 3:2; 5:​1, 2) Siya mipaluyo kang Zorobabel sa pagsukol sa mga kaaway sa pagtukod pag-usab sa templo.​—Esd 4:1-3.

Ang pipila sa mga tigulang nga lakip sa namalik nga mga Israelinhon nakakita sa himaya sa templo ni Solomon ug nag-isip sa natukod pag-usab nga templo ingong wala ray bili kon itandi niini. Si manalagnang Haggeo gisugo aron mosulti kang Zorobabel ug Josue (Jesua), nga sultihan sila nga ang himaya sa ulahing balay molabaw pa kay nianang nauna. Buhaton kini ni Jehova pinaagi sa pagpasulod diha niini sa “tilinguhaong mga butang sa tanang kanasoran.”​—Hag 2:1-4, 7, 9.

Si manalagnang Zacarias gihatagan ug panan-awon nga niana iyang nakita ang hataas nga saserdoteng si Josue (Jesua) nga nagbarog atubangan sa manulonda ni Jehova, ug si Satanas nagbarog diha sa iyang tuo aron sa pagpakigbatok kaniya. Si “Josue” gihatagan ug besting halangdon ug usa ka hinlong purong ilis sa iyang mahugawng mga besti. Dayon gisultihan si “Josue” bahin sa alagad sa Diyos nga mao ang Turok.​—Zac 3:1-8.

Sa laing higayon gisultihan ni Jehova si Zacarias sa pagbutang ug purongpurong sa ulo ni Josue (Jesua) ug sa pagsulti kaniya: “Ania ang tawo kansang ngalan maoy Turok. . . . Ug siya magatukod sa templo ni Jehova, . . . ug siya mahimong saserdote sa iyang trono.” Kining tagnaa tinong mapadapat sa usa ka tawo sa umaabot kay, ilalom sa Balaod, ang pagkasaserdote ug pagkahari maoy bulag gayod, ug ang Hataas nga Saserdoteng si Josue wala gayod magmando ingong hari sa Israel.​—Zac 6:11-13.

5. Ang pangulo sa usa ka Levihanong balay, nga ang pipila kanila mibalik gikan sa pagkadestiyero sa Babilonya uban kang Zorobabel niadtong 537 W.K.P. (Esd 2:40; Neh 7:43) Kon dili laing tawo nga may samang ngalan, usa ka hawas sa balay ni Jesua nga mipirma sa “kasaligang kontrata” nga gihimo sa mga saserdote, mga prinsipe, ug sa katawhan aron molakaw sumala sa balaod sa Diyos. Siya maoy anak nga lalaki ni Azanias (Neh 9:38; 10:​1, 9) ug lagmit mao ra nga Jesua nga gihisgotan sa Nehemias 12:​8, 24.

“Si Jozabad nga anak nga lalaki ni Jesua,” usa sa mga Levihanon nga kaniya gitugyan ni Esdras ang plata, bulawan, ug mga sudlanan alang sa balay sa Diyos, lagmit maoy usa ka membro niini nga balay ni Jesua.​—Esd 8:33.

Si Ezer nga anak nga lalaki ni Jesua, usa ka prinsipe sa Mizpa, nga nagtrabaho ubos sa pagdumala ni Nehemias sa pag-ayo sa paril sa Jerusalem, tingali sakop sa mao ra nga banay.​—Neh 3:19.

6. Usa sa Levihanong mga tagdumala sa pagtukod pag-usab sa templo.​—Esd 3:9.

7. Usa sa mga Levihanon nga nagbasa ug nagpatin-aw sa Balaod ngadto sa katawhan ug nanguna sa pagsimba, ubos sa pagdumala ni Esdras. Lagmit sakop sa mao ra nga balay sa Num. 5.​—Neh 8:7; 9:​4, 5.

8. Usa ka lungsod sa habagatang bahin sa Juda diin mipuyo ang pipila ka namalik nga Hudiyong nahibilin. Gituohan sa pipila ka eskolar nga ang nahimutangan niini mao ang Tell es-Saʽweh (Tel Yeshuʽa), mga 15 km (9 mi) sa SAS sa Beer-seba. (Neh 11:​25, 26) Tingali mao ang Sema sa Josue 15:​26, ug lagmit ang Sheba sa Josue 19:2.