Kining ngalana may duha ka espeling sa Hebreohanon, bisan tuod “Joas” lamang kini sa Cebuano. Ang una ug mas komon, ang Yoh·ʼashʹ, maoy pinamubo sa Jehoas. Ang Numero 1 ug 5 nga gitala sa ubos mao ang laing espeling nga Yoh·ʽashʹ.

1. Usa ka Benjaminhon sa linya sa banay ni Beker.​—1Cr 7:​6, 8.

2. Usa ka kaliwat ni Juda pinaagi sa iyang ikatulong ginganlang anak nga lalaki nga si Sela.​—1Cr 2:3; 4:​21, 22.

3. Ang amahan ni Maghuhukom Gideon; usa ka Abiezeranhon sa tribo ni Manases. (Huk 6:​11, 15; 7:14; 8:​13, 32) Dayag nga si Joas maoy usa ka tawong adunahan ug impluwensiyado diha sa komunidad, nga nagbaton ug usa ka halaran alang kang Baal, ingon man usa ka “sagradong poste,” ug naghupot ug usa ka panimalay sa mga sulugoon. Sa dihang ang iyang anak nga lalaki nga si Gideon sa hilom nagtumpag niini nga halaran ug sa sagradong poste, ug puli niini nagtukod ug halaran alang kang Jehova diin sa ibabaw niini naghalad siya ug torong baka nga pito ka tuig ang kagulangon, ang mga lungsoranon sa maong dapit namugos kang Joas nga iyang itugyan ang iyang anak aron patyon. Ang tubag ni Joas mao: “Kon [si Baal] Diyos, pahimoa siyag legal nga depensa alang sa iyang kaugalingon.” Ug tungod niana gitawag ni Joas ang iyang anak nga Jerubaal.​—Huk 6:25-32; 8:29.

4. Usa sa mga tawong gamhanan sa tribo ni Benjamin nga miduyog sa kasundalohan ni David didto sa Ziklag sa dihang si David gigukod ni Saul; anak nga lalaki o kaliwat ni Semaa.​—1Cr 12:1-3.

5. Usa ka pangulo nga gitudlo ni Haring David sa pagdumala sa mga abiyo sa lana.​—1Cr 27:​28, 31.

6. Usa niadtong gipiyalan ni Ahab sa pagbilanggo sa matinumanong manalagna nga si Micaias. Siya gitawag nga “anak nga lalaki sa hari.” (1Ha 22:​26, 27; 2Cr 18:​25, 26) Kini nga ekspresyon mahimong magtumong sa usa ka anak ni Haring Ahab o kini mahimong magpasabot sa usa ka opisyal nga harianon ug kagikan o sa usa nga suod nga nalangkit sa panimalay sa hari.

7. Pinamubo sa Jehoas, ang hari sa Juda ug anak nga lalaki ni Ahazias. (2Ha 11:​2, 3, 21) Ang Joas ingong laing espeling sa Jehoas makaplagan sa makadaghan diha sa Masoretikong teksto nga Hebreohanon, sumala sa gipunting sa mga nota o footnote sa New World Translation (Rbi8).​—2Ha 12:19; 1Cr 3:11; 2Cr 24:​1, 2; tan-awa ang JEHOAS Num. 1.

8. Pinamubo sa Jehoas, ang hari sa Israel, nga anak nga lalaki ni Jehoahaz ug apo ni Jehu. (2Ha 14:​1, 8, 9) Kining laing espeling (Joas) sagad nga makaplagan diha sa Masoretikong teksto.​—2Ha 13:​9, 12, 13; 2Cr 25:​17, 18, 21; Os 1:1; Am 1:1; tan-awa ang JEHOAS Num. 2.