[pinamubo sa Jehohanan, nga nagkahulogang “Si Jehova Nagpakitag Pabor; Si Jehova Mapuangoron”].

Ang ngalang Juan naggikan niini nga Hebreohanong ngalan.

1. Usa ka gamhanang Benjaminhon nga hanas sa paggamit sa iyang duha ka kamot ug usa sa batid nga mga manggugubat nga mianib kang David didto sa Ziklag.​—1Cr 12:1-4.

2. Usa ka Gadhanong opisyal ug usa sa 11 ka talagsaong mga manggugubat nga midapig kang David didto sa kamingawan.​—1Cr 12:​8, 12-15.

3. Usa ka hataas nga saserdote. Lagmit ang iyang anak nga si Azarias mao ang hataas nga saserdote sa dihang si Haring Uzzias migawi nga mapangahason.​—1Cr 6:​9, 10; 2Cr 26:​19, 20.

4. Panganayng anak nga lalaki ni Haring Josias. (1Cr 3:15) Sanglit wala siya hisgoti nga nahimong manununod sa trono sa Juda, dili sama sa iyang tulo ka manghod nga lalaki, dayag nga siya namatay sa wala pa mamatay ang iyang amahan.​—2Ha 23:​30, 34; 24:17; Jer 22:11; tan-awa ang JOSIAS Num. 1.

5. Usa sa mga pangulo sa kasundalohan nga nahibilin sa Juda human sa tiningob nga pagdestiyero ngadto sa Babilonya niadtong ting-init sa 607 W.K.P. Kini nga anak nga lalaki ni Karea mipaluyo gilayon sa pagkatudlo kang Gedalias ug, sa pagkahibalo sa laraw ni Ismael sa pagpatay sa gobernador, mihangyo kang Gedalias nga tugotan siya sa pagpatay kang Ismael sa tago apan siya wala tugoti. (Jer 40:​7, 8, 13-16) Si Gedalias gipatay, si Johanan nangulo sa kasundalohan aron ipanimalos siya, ug nabawi ang mga tawong gibihag ni Ismael; apan ang mamumuno mismo nakaikyas ngadto sa Ammon. (Jer 41:11-16) Kay nahadlok nga panimaslan sa mga Babilonyanhon, si Johanan ug ang uban pa nangutana kang manalagnang Jeremias kon unsay angay nilang buhaton, apan, inay mosunod sa tambag ni Jehova nga magpabilin sa ilang yuta, sila mikalagiw ngadto sa Ehipto, nga nagdala kang Jeremias uban kanila.​—Jer 42:1–​43:7; 2Ha 25:23-26.

6. Anak nga lalaki ni Hakatan ug pangulo sa 110 ka lalaki sa balay sa amahan ni Azgad kinsa mibalik uban kaniya sa Jerusalem, nga miuban kang Esdras niadtong 468 W.K.P.​—Esd 8:​1, 12.

7. Apo nga lalaki ni Eliasib, ang hataas nga saserdote nga katalirongan ni Nehemias. Ang pagtawag kaniya nga Jonatan sa Nehemias 12:11 lagmit maoy usa ka sayop sa eskriba, sanglit ang mga ngalang “Johanan” ug “Jonatan” amgid kaayo diha sa Hebreohanon. Si Johanan gihisgotan sa Nehemias 12:​22, 23 ug diha sa usa ka sulat nga nakaplagan taliwala sa Elephantine Papyri, diin siya gihisgotan ingong hataas nga saserdote.​—Jewish Antiquities, ni F. Josephus, XI, 297 (vii, 1).

8. Anak nga lalaki ni Elioenai; ang ngalan ni Johanan makita diha sa usa ka talaan sa balay ni David nga naglakip kang Zorobabel ug sa iyang mga kaliwat.​—1Cr 3:​1, 10, 19, 24.