[kon nalangkit sa lintunganayng pulong nga Arabiko, Hinaot Moayo si Jehova; Si Jehova Nag-ayo].

1. Anak nga lalaki ni Haring Amon sa Juda pinaagi kang Jedida nga anak nga babaye ni Adaia. (2Ha 22:1) Si Josias labing menos may duha ka asawa, si Hamutal ug Zebida. (2Ha 23:​31, 34, 36) Sa iyang upat ka anak nga lalaki nga gihisgotan sa Bibliya, ang panganay lamang nga si Johanan ang wala maghari sa Juda.​—1Cr 3:​14, 15.

Human patya ang iyang amahan ug ang mga nagkunsabo, ang otso-anyos nga si Josias nahimong hari sa Juda. (2Ha 21:​23, 24, 26; 2Cr 33:25) Mga unom ka tuig sa ulahi si Zebida nanganak sa ikaduhang anak nga lalaki ni Josias nga si Jehoiakim. (2Ha 22:1; 23:36) Sa ikawalong tuig sa iyang paghari, si Josias naningkamot sa pagkat-on ug sa pagbuhat sa kabubut-on ni Jehova. (2Cr 34:3) Lagmit niining panahona usab nga gipanganak si Jehoahaz (Salum), anak nga lalaki ni Josias pinaagi kang Hamutal.​—2Ha 22:1; 23:31; Jer 22:11.

Sa panahon sa iyang ika-12 nga tuig nga paghari, gisugdan ni Josias ang usa ka kampanya batok sa idolatriya nga dayag nga nagpadayon hangtod sa ika-18 nga tuig sa iyang paghari. Ang mga halaran nga gigamit sa bakak nga pagsimba giguba ug gipasipalahan pinaagi sa pagsunog ug mga bukog sa tawo sa ibabaw niini. Dugang pa, gidugmok ang sagradong mga poste, kinulit nga mga larawan, ug inumol nga mga estatwa. Gani gipakaylap pa ni Josias ang iyang mga paningkamot hangtod sa amihanang bahin, ang teritoryo kanhi sa napulo-ka-tribong gingharian nga nahimong biniyaan tungod sa pagsakop sa Asirya ug sa misunod nga pagkadestiyero sa mga molupyo niini. (2Cr 34:3-8) Dayag nga may maayong epekto ang mahukmanong mga pagsaway ni Sofonias ug Jeremias batok sa idolatriya.​—Jer 1:​1, 2; 3:6-10; Sof 1:1-6.

Sa dihang nahuman ni Haring Josias ang paghinlo sa yuta sa Juda ug samtang iyang gipaayo ang templo ni Jehova, nakaplagan sa Hataas nga Saserdoteng si Hilkias ang “basahon sa balaod ni Jehova nga gihatag pinaagi sa kamot ni Moises,” nga sa walay duhaduha mao ang orihinal nga kopya. Kay gitugyanan ni Hilkias niining talagsaong kaplag, gitaho sa sekretaryo nga si Sapan ang pag-uswag sa pag-ayo sa templo ug human niana gibasa ang basahon ngadto kang Josias. Sa pagkadungog sa pulong sa Diyos, gigisi niining matinumanong hari ang iyang besti ug dayon gisugo ang lima-ka-tawong delegasyon aron magpakisayod kang Jehova alang kaniya ug alang sa katawhan. Ang delegasyon miadto sa babayeng manalagna nga si Hulda, nga nagpuyo niadtong tungora sa Jerusalem, ug sa pagbalik nagdalag taho nga ingon niini: ‘Adunay katalagman nga moabot tungod sa dili pagsunod sa Balaod ni Jehova. Apan tungod kay ikaw, Haring Josias, nagpaubos sa imong kaugalingon, ikaw pagatigomon ngadto sa imong lubnganan diha sa kalinaw ug dili makakita sa katalagman.’​—2Ha 22:3-20; 2Cr 34:8-28; tan-awa ang HULDA.

 Human niana gitigom ni Josias ang tanang katawhan sa Juda ug Jerusalem, lakip ang mga ansiyano, mga saserdote, ug mga manalagna, ug gibasa ang Balaod sa Diyos ngadto kanila. Unya, sila naghimog pakigsaad sa pagkamatinumanon sa atubangan ni Jehova. Dayon misunod ang ikaduha ug dayag nga mas mainit nga kampanya batok sa idolatriya. Ang mga saserdote sa langyawng diyos sa Juda ug Jerusalem gipahunong sa ilang mga kalihokan, ug ang mga saserdoteng Levihanon nga nalangkit sa sayop nga pagsimba sa hatag-as nga mga dapit gihikawan sa pribilehiyo nga mag-alagad sa halaran ni Jehova. Ang hatag-as nga mga dapit nga gitukod sa miaging kasiglohan panahon sa paghari ni Solomon gihimong bug-os nga dili angay sa pagsimba. Ingong katumanan sa usa ka tagna nga gipahayag mga 300 ka tuig kanhi pinaagi sa wala nganli nga tawo sa Diyos, gigun-ob ni Josias ang halaran nga gitukod didto sa Bethel ni Haring Jeroboam sa Israel. Ang hatag-as nga mga dapit gikuha dili lamang didto sa Bethel kondili sa ubang mga siyudad usab sa Samaria, ug ang idolatrosong mga saserdote gihalad ibabaw sa mga halaran nga ilang gialagaran.​—1Ha 13:​1, 2; 2Ha 23:1-20; 2Cr 34:29-33.

Sa ika-18 nga tuig sa iyang paghari, gihikay ni Josias ang kasaulogan sa Paskuwa, sa Nisan 14. Nalabwan niini ang bisan unsang Paskuwa nga gisaulog sukad sa mga adlaw ni manalagnang Samuel. Si Josias mismo miamot ug 30,000 ka halad sa Paskuwa ug 3,000 ka baka.​—2Ha 23:21-23; 2Cr 35:1-19.

Mga upat ka tuig sa ulahi si Josias nanganak kang Matanias (Zedekias) pinaagi sa iyang asawa nga si Hamutal.​—2Ha 22:1; 23:​31, 34, 36; 24:​8, 17, 18.

Sa naghinapos na ang 31-ka-tuig nga paghari ni Josias (659-629 W.K.P.), si Paraon Neko nangulo sa iyang kasundalohan paamihanan aron sa pagtabang sa mga Asiryanhon. Tungod sa usa ka katarongan nga wala ibutyag sa Bibliya, si Haring Josias wala manumbaling sa “mga pulong ni Neko gikan sa baba sa Diyos” ug misulay sa pagpaatras sa kasundalohang Ehiptohanon didto sa Megido, apan grabe siyang nasamdan sa maong panagsangka. Gidala siyag balik sa Jerusalem sakay sa usa ka karong iggugubat ug namatay samtang diha sa dalan o kaha sa iyang pag-abot didto. Ang kamatayon ni Josias nakapaguol pag-ayo sa iyang mga sakop. “Ang tibuok Juda ug ang Jerusalem nagbangotan tungod kang Josias. Ug si Jeremias miawit tungod kang Josias; ug ang tanang lalaking mag-aawit ug mga babayeng mag-aawit nagpadayon paghisgot bahin kang Josias diha sa ilang mga awit sa pagbangotan hangtod karong adlawa.”​—2Cr 35:20-25; 2Ha 23:​29, 30; tan-awa ang ASIRYA (Ang pagkapukan sa imperyo).

Bisan tuod tulo sa mga anak nga lalaki ni Josias ug usa ka apong lalaki ang naghari sa Juda, walay usa kanila ang misundog sa iyang maayong sulondan sa pagdangop kang Jehova uban sa iyang tibuok kasingkasing, kalag, ug kusog. (2Ha 23:​24, 25, 31, 32, 36, 37; 24:​8, 9, 18, 19) Kini nagpakita usab nga bisan pag ang mga paningkamot ni Josias nakawagtang sa panggawas nga mga butang nga nalangkit sa idolatriya, ang katawhan sa katibuk-an wala mobalik kang Jehova uban sa bug-os nga kasingkasing. Tungod niini, ang umaabot nga katalagman tinong modangat.​—Itandi ang 2Ha 23:​26, 27; Jer 35:​1, 13-17; 44:15-18.

2. “Anak nga lalaki ni Sofonias” nga nagpuyo sa Jerusalem human sa pagkadestiyero, lagmit mao ra usab si Hen.​—Zac 6:​10, 14.