Kini mao ang umaw nga sidlakang mga bakilid sa kabukiran sa Juda nga ang kinadak-ang bahin niini walay nagpuyo. (Huk 1:16) Kini nga rehiyon sa kamingawan, nga may gilapdong mga 16 ngadto sa 24 km (10 ngadto sa 15 mi), nagsukad duol sa S sa Bukid sa mga Olibo ug miabot ug mga 80 km (50 mi) ubay sa K nga kabaybayonan sa Patayng Dagat. Sa kinadak-ang bahin, gilangkoban kini sa hamison ug linginong umaw nga kabungtoran sa humokon nga tisas, nga giulang sa mga bul-oganang walog ug mga lugot. (MGA HULAGWAY, Tomo 1, p. 335, 747) Paingon sa Patayng Dagat, adunay linginong kabungtoran nga may batoong mga lugot, ug atubangan sa dagat adunay samag-paril nga gansangong mga pangpang. Kay padulhog ug mga 1,200 m (3,900 p) diha sa 24 km (15 mi), kini nga kamingawan nasalipdan gikan sa K nga hangin nga nagdalag dag-om ug busa makadawat ug diyutay lamang nga ulan. Sa samang higayon kini apupa usab sa hangin nga mohuros gikan sa S. Apan kon moulan, ang tubig mobul-og agi sa uga nga mga bul-oganang walog, ug sulod sa pipila ka semana sa ting-ulan ang kamingawan magpatunghag diyutayng mga tanom.

Si David miingon nga ang kamingawan sa Juda “usa ka yuta nga mamala ug umaw, diin walay tubig.” (Sal 63:Sup, 1) Walay tinubdan sa sapa sa taliwala niining umaw nga rehiyon, ug dinhi walay tubig nga moagos sa ibabaw sa yuta. Kasukwahi kaayo, ang sapa nga migula gikan sa templo sa panan-awon ni Ezequiel miagos latas niini nga kamingawan ug nakapabuhi sa daghang kahoy ubay sa mga tampi niini.​—Eze 47:1-10.

Sa walay duhaduha nga ang ‘kanding alang kang Azazel’ gipalakaw ngadto sa awaaw nga Kamingawan sa Juda panahon sa tinuig nga pagsaulog sa Adlaw sa Pagtabon-sa-Sala human kini dad-a gikan sa templo sa Jerusalem. (Lev 16:​21, 22) Sa unang siglo K.P., si Juan nga Tigbawtismo nagsugod sa iyang ministeryo sa usa ka dapit niini nga rehiyon sa A sa Patayng Dagat. (Mat 3:1-6) Dayag nga sa usa ka dapit niining mao gihapon nga kamingawan nga si Kristo Jesus gitental sa Yawa.​—Mat 4:1.