Usa ka medyo gamay nga kahita nga gisudlan ug upat ka bahin sa Balaod (Ex 13:​1-10, 11-16; Deu 6:4-9; 11:13-21) ug gisul-ob sa Hudiyong mga lalaki diha sa ilang agtang ug walang bukton. Maylabot sa batasan sa pagsul-ob sa maong mga kahita, o mga pilakterya, ang The Jewish Encyclopedia (1976, Tomo X, p. 21) nag-ingon: “Ang mga balaod nga naglatid sa pagsul-ob sa mga pilakterya gipasukad sa mga Rabbi gikan sa upat ka teksto sa Bibliya (Deut. vi. 8, xi. 18; Ex. xiii. 9, 16). Bisan tuod kini nga mga teksto literal nga gisabot sa kadaghanang komentarista, . . . ang mga Rabbi nagtuo nga ang katibuk-ang balaod lamang ang gipahayag diha sa Bibliya, ang pagpadapat ug pagpatin-aw niini maoy bug-os nga pinasukad sa tradisyon ug pangagpas.”

Gisaway ni Kristo Jesus ang mga eskriba ug mga Pariseo tungod sa ‘pagpalapad sa mga kahita nga sudlanag kasulatan nga ilang ginasul-ob ingong panalipod.’ (Mat 23:5) Pinaagi sa pagpadako niini nga mga kahita, dayag nga buot nilang ipakita sa uban nga sila maoy masiboton kaayo ug masinundanon sa Balaod. Ang mga pulong ni Jesus nagpaila nga ang relihiyosong mga pangulo nag-isip niini nga mga kahita ingong mga panalipod, o mga panagang. Ang Gregong pulong nga phy·la·kteʹri·on, sa pagkatinuod, pangunang nagpasabot sa usa ka kampo, kuta, o salipdanan.​—Tan-awa ang BUGKOS SA AGTANG.