[Heb., plural, bar·bu·rimʹ].

Sa Bibliya, kini nga ngalan kas-a lang makita diha sa 1 Hari 4:​23, diin ang talaan sa inadlaw nga mga tagana sa pagkaon sa palasyo ni Solomon naglakip sa “mga kakok [bar·bu·rimʹ].” (JB; NW) Samtang ang mabasa dinhi sa ubang mga bersiyon (KJ, RS) maoy “langgam,” ang bar·bu·rimʹ daw nagtumong sa usa ka espesipikong matang sa langgam inay nga usa ka komon nga termino lamang. Bisan tuod ang pipila nagtuo nga kini mao ang kinapon nga sunoy, ang himungaan nga guinea, o ang gansa, ang leksikograpo nga si W. Baumgartner (Hebräisches und Aramäisches Lexikon zum Alten Testament, Leiden, 1967, p. 147) nagtuo nga kini mao ang “kakok,” ug kini daw gipaila sa Arabikong ngalan sa maong langgam nga abu burbur.

Ang kasagarang kakok (Cuculus canorus) ug ang dagkong puntikpuntikon nga kakok (Clamator glandarius) pulos moagi sa Palestina sa ilang paglalin paingon sa amihanan, nga moabot sa sayong bahin sa Marso. Ang kakok maoy kasarangan lang sa gidak-on, ug kaamgid sa gagmayng banog, nga medyo kurbado, hait, ug talinis ang sungo. Kini nga langgam sagad may mga bulok nga dili daling  mamatikdan sama sa pughaw nga abohon o pughaw nga pagkakape ngadto sa pulahong pagkakape o itom. Ang tiyan niini maoy sagad puti nga may itom nga mga budlis.

Bisan tuod giisip sa uban nga ang kakok gamay ra nga langgam aron mahilakip sa pagkaon ni Solomon, angayng hinumdoman nga bisan ang gihimulbolan nga mga goryon gibaligya kanhi sa mga tiyanggihan sa Tungang Sidlakan. (Mat 10:29) Dugang pa, kini nga mga kakok maoy “pinatambok,” ug labot niini ang The American Cyclopædia nag-ingon: “Sa tinghunlak kini maoy tambok ug kinaham nga pagkaon; ampay kini sa mga tawo sa kakaraanan, ug ang unod niini gituohan nga maayong tambal sa panglawas.”​—1883, Tomo V, p. 557.

Ang kakok dili usa ka tigkaon ug patayng hayop ug dili usa ka langgam nga mandadagit, apan usa ka mahinungdanong langgam nga tigkaon ug mga insekto. Kini maoy “mahinlo” sumala sa Balaod ug haom nga ilakip sa pagkaon ni Solomon. Bisan tuod “ang kakok” gilakip sa King James Version taliwala sa mahugaw nga mga langgam, sa Levitico 11:16 ug sa Deuteronomio 14:​15, kini nga hubad (sa Hebreohanong shaʹchaph) wala na dawata.​—Tan-awa ang KANAWAY.