Ang makanunayon ug malahutayon nga pagbuhat; pagkamanggimbuhaton; pagkakugihan; kasibot. Kini nga termino sagad nga nagpasabot sa matarong ug mapuslanon nga trabaho. Kaatbang kini sa pagkataspokan o pagkawalay-buhat.

Sa Bibliya ang Gregong pulong nga gihubad nga “kakugi” mas sagad nga gihubad nga “pagkamatinuoron,” “bug-os nga pagkamatinuoron,” o “tim-os nga paningkamot.” Ang kahulogan niini nga pulong usahay gipahayag usab pinaagi sa hubad nga “pagdali,” “tulin,” o “buluhaton.”

Ang mga Kristohanon gitambagan nga dili magtinaspokan o magmaluya sa pagbuhat ug maayo. Si Pablo miingon: “Kami nagtinguha nga ang matag usa kaninyo magpakita sa samang kakugi [sa literal, “magdali”] aron makabaton sa bug-os nga pagsalig sa paglaom hangtod sa kataposan, aron dili kamo mahimong tapolan, kondili mahimong mga tigsundog kanila nga pinaagi sa pagtuo ug pailob nagapanunod sa mga saad.” (Heb 6:​11, 12; itandi ang Pr 10:4; 12:24; 18:9.) Gisultihan ni Jesu-Kristo ang iyang mga tinun-an: “Panlimbasogi ninyo nga kusganon ang pagsulod agi sa sigpit nga pultahan, tungod kay daghan, sultihan ko kamo, ang maninguha sa pagsulod apan dili makahimo.” (Luc 13:24) Si Pablo mismo maoy usa ka panig-ingnan sa maong kusganong pagpanlimbasog. (Col 1:29; 2Te 3:7-9) Siyempre, si Jehova ug ang iyang Anak mao ang labing maayong mga panig-ingnan sa kakugi.​—Ju 5:17; Isa 40:26.

Aron sila dili mahimong di-aktibo o dili-mabungahon, ang mga Kristohanon kinahanglang ‘moamot agig pagsanong [sa mga saad sa Diyos] sa tanang tim-os nga paningkamot’ nga ipuno sa ilang pagtuo ang kaligdong, kahibalo, pagpugong-sa-kaugalingon, pagkamainantoson, diyosnong pagkamahinalaron, inigsoong pagbati, ug gugma. (2Pe 1:4-8) Kini nanginahanglag padayon nga pagpakitag makugihon nga paglahutay (2Ti 2:15; Heb 4:11) ug walay hunong nga pagtagad. (Heb 2:1) Ang dakong bahin sa kusog nga gikinahanglan alang niini naggikan sa tabang sa espiritu ni Jehova. Wala nay mas kusganong tambag alang sa panginahanglan nga magmakugihon kay sa gisulti ni apostol Pablo: “Ayaw paglangaylangay sa inyong buluhaton. Magmainiton sa espiritu. Magpaulipon kang Jehova”! Kini nga kinahanglanon sa pagkamakugihon mapadapat sa tanang ministro (“tumanon nato kini nga ministeryo”), apan ilabina niadtong adunay mga katungdanan sa pagdumala sa mga tigom ug sa mga kalihokan sa kongregasyon, kay “siya nga nagadumala, ipabuhat kini kaniya sa bug-os nga pagkamatinuoron.”​—Rom 12:​7, 8, 11.

Sa Kristohanong kongregasyon, ang mga kabos nga nagadawat ug materyal nga tabang gikan sa kongregasyon kinahanglan nga mga kugihan. Ang lagda sa Kasulatan mao: “Kon adunay dili buot magtrabaho, ayaw usab siya pakan-a.” Ang tambag alang niadtong wala magtrabaho mao nga sila kinahanglang magmapuliki, “nga pinaagi sa pagtrabaho nga malinawon sila magakaon sa pagkaon nga ilang gihagoan.” (2Te 3:10-12) Ang nag-angkong Kristohanon nga nagdumili o wala magtagana sa iyang panimalay “naglimod sa pagtuo ug mas daotan pa kay sa tawong walay pagtuo.” (1Ti 5:8) Bisan ang kabos nga mga babayeng balo, sa dili pa ilakip diha sa talaan sa kongregasyon para sa regular nga tagana sa materyal nga tabang, kinahanglang adunay rekord sa Kristohanong kalihokan, nga “makugihong nagsunod sa tanang maayong buhat.”​—1Ti 5:​9, 10.

Mga Ganti sa Pagkamakugihon. Ang dagayang mga ganti mabatonan sa kugihang tawo karon ug sa umaabot. “Ang kamot sa kugihan mao ang makapadato.” (Pr 10:4) “Ang kamot sa mga kugihan mao ang magamando.” (Pr 12:24) Ang ilang kalag “patambokon.” (Pr 13:4) Alang sa kugihang asawa, ang iyang “mga anak mobangon ug magpahayag kaniya nga malipayon; ang iyang tag-iya mobangon, ug siya magdayeg kaniya.” Labot kaniya, kini ang gipahayag: “Hatagi ninyo siya sa bunga sa iyang mga kamot, ug padayega kaniya ang iyang mga buhat diha sa mga ganghaan.” (Pr 31:​28, 31) Labaw sa tanan, ang espirituwal nga  mga igsoon ni Kristo gisultihan: “Buhata ang kutob sa inyong maarangan aron maseguro ang inyong pagkatinawag ug pagkapinili; kay kon kamo magpadayon sa pagbuhat niining mga butanga kamo dili gayod mangapakyas. Sa pagkatinuod, sa ingon dagayang itagana kaninyo ang pagsulod ngadto sa walay kataposang gingharian sa atong Ginoo ug Manluluwas nga si Jesu-Kristo.”​—2Pe 1:​10, 11.