[Heb., qin·na·mohnʹ; Gr., kin·naʹmo·mon].

Ang kahoyng kaningag (Cinnamomum zeylanicum) maoy kapamilya sa kahoyng lawrel, nga lakip niana ang kahoyng casia ug camphor. Kini molambo diha sa buhaghag, balason, umogon nga yuta ug daghan kini sa Sri Lanka ug sa Java. Ang Hebreohanong ngalan niini lagmit nga langyaw ug kagikan, ug ang produkto niini mopatim-aw nga giimportar ngadto sa Yutang Saad.

Ang kaningag moabot sa kinahabogan nga mga 9 m (30 p) ug adunay hamis, abohon-ug-bulok nga panit ug mosanggaka nga mga sanga. Ang evergreen nga mga dahon niini nga samag ulo sa bangkaw maoy berde sa ibabaw apan puti sa ilalom ug moabot ug mga 20 ngadto sa 23 sm (8 ngadto sa 9 pul.) ang gitas-on ug mga 5 sm (2 pul.) ang gilapdon. Ang gagmay, puti o dalagon nga mga bulak niini magpungpong. Ang panit niini sa gawas halos walay baho ug dili kaayo mapuslanon. Ang ginabaligya nga kaningag makuha gikan sa itomon nga ilalom nga panit niini. Ang humot nga lana makuha usab gikan sa panit niini.

Ang kaningag gigamit sa paghimo sa balaang igdidihog nga lana ingong usa sa “labing maayo nga mga pahumot.” (Ex 30:23) Kini giwisik diha sa mga higdaanan (Pr 7:17), mahulagwayong gigamit sa paghubit sa hinigugmang Sulamita (Aw 4:​13, 14), ug lakip sa mga produkto nga gibaligya sa mga nagapanaw nga mga magpapatigayon ngadto sa “Dakong Babilonya” una pa kini malaglag.​—Pin 18:​2, 11-13.