Usa ka kinutaang siyudad sa Juda sa Sepela. (Jos 15:​20, 33, 44; 1Sa 23:7) Ang Keila tingali gitukod o, sa usa ka panahon, gigamhan sa pipila ka kaliwat ni Caleb. (1Cr 4:​15, 19) Sa kasagaran kini gituohan nga mao ang Khirbet Qila (Qeila), nga nahimutang sa usa ka bungtod nga mga 14 km (8.5 mi) sa AK sa Hebron. Sama sa rehiyon sa karaang Keila, karong adlawa may mga lugas nga gitanom sa kasikbit nga dapit sa Khirbet Qila.​—Itandi ang 1Sa 23:1.

Si David, samtang gigukod ni Haring Saul, nagluwas sa Keila gikan sa mga kamot sa mga Filistehanon. Apan human niadto, siya ug ang iyang mga tawo kinahanglang moikyas gikan sa siyudad aron sila dili ikatugyan sa mga tag-iyag yuta sa Keila ngadto sa kasundalohan ni Saul.​—1Sa 23:​5, 8-13.

Ang siyudad gipuy-an pag-usab human sa pagkadestiyero didto sa Babilonya. Sa panahon nga ang mga paril sa Jerusalem giayo ubos sa pagdumala ni Nehemias, dihay duha ka katunga nga distrito sa Keila, nga ang matag usa adunay kaugalingong “prinsipe.”​—Neh 3:​17, 18.