Ang pangunang bathala sa mga Moabihanon, nga gihisgotan ingong ‘ang katawhan ni Kemos.’ (Num 21:29; Jer 48:46) Ang pipila ka eskolar nagtuo nga kini nga bathala mao ang Baal sa Peor tungod kay gihisgotan kini uban sa mga Moabihanon. (Num 25:1-3) Sa mga kahimtang nga hilabihan kapit-os, kon dili man sagad nga gibuhat, lagmit nga ang mga bata gihalad ngadto kang Kemos.​—2Ha 3:​26, 27.

Ang itom nga basaltong bantayog, nga sagad nailhan ingong ang Bato sa Moab, nga gipatindog ni Haring Mesa sa Moab aron sa paghandom sa iyang pag-alsa batok sa Israel, naghatag ug dugang katin-awan kon sa unsang paagi giisip sa mga Moabihanon ang ilang diyos nga si Kemos. Sumala niini nga monyumento, si Kemos naghatag kanilag kadaogan sa pagpakiggubat, ug ang pakiggubat gihimo ubos sa iyang mando. Gipasidungog ni Haring Mesa kang Kemos ang kaluwasan gikan sa Israelinhong pagpanglupig, ug siya nangatarongan nga ang aktuwal nga pagsakit gikan sa mga kamot ni Omri nga hari sa Israel maoy tungod sa kasuko sa diyos sa iyang yuta.

Si Jepte naghisgot kang Kemos ingong ang diyos sa mga Ammonhanon. (Huk 11:24) Gikuwestiyon sa pipila ka eskolar ang katukma sa pahayag ni Jepte tungod kay sa ubang mga teksto si Kemos kanunayng gilangkit sa mga Moabihanon. Apan, angayng hinumdoman nga ang mga Ammonhanon nagsimba ug daghang diyos. (Huk 10:6) Dugang pa, sanglit ang mga Ammonhanon ug ang mga Moabihanon maoy managsilingan nga katawhan, nga parehog kagikan pinaagi sa pag-umangkon ni Abraham nga si Lot, dili ikahibulong nga kining duha ka nasod parehong nagsimba kang Kemos.

Ang pagsimba kang Kemos dayag nga gisugdan diha sa Israel panahon sa paghari ni Solomon. Walay duhaduha nga ubos sa impluwensiya sa iyang Moabihanong mga asawa, gitukod ni Solomon ang hataas nga dapit alang kang Kemos “didto sa bukid nga atbang sa Jerusalem.” (1Ha 11:​1, 7, 8, 33) Sa panahon sa malukpanon nga relihiyosong reporma ni Josias, kapin sa tulo ka siglo sa ulahi, kining hataas nga dapit gihimo nga dili angay alang sa pagsimba.​—2Ha 23:13.

Ang manalagnang si Jeremias, sa pagtagna sa katalagman sa Moab, nagpaila nga madestiyero ang pangunang diyos niini nga si Kemos ingon man ang iyang mga saserdote ug mga prinsipe. Ikaulaw sa mga Moabihanon ang ilang diyos tungod kay kini walay mahimo, sama nga gikaulaw sa mga Israelinhon sa napulo-ka-tribo nga gingharian ang Bethel, lagmit tungod sa pagkalangkit niini sa pagsimba sa nating baka.​—Jer 48:​7, 13, 46.