[Kang (Iya ni) Kenaz].

1. Membro sa usa ka dili-Israelinhong katawhan nga diha o duol sa Canaan kansang teritoryo gisaad ni Jehova ngadto sa binhi ni Abram. (Gen 15:​18, 19) Dayag nga ang mga Kenizihanon mibalhin ngadto sa Negeb gikan sa HS, lagmit mikaylap sa usa ka bahin sa Edom ug diha sa nahimong habagatang Juda, nga naghimo niana una pa masakop sa mga Israelinhon ang Yutang Saad.

Gilangkit sa pipila ka eskolar ang mga Kenizihanon kang Kenaz nga usa ka sultan sa Edom nga naggikan kang Esau pinaagi kang Elipaz (Gen 36:​15, 16), ug busa gilantaw ingong usa ka prominenteng banay nga Edomhanon. Apan, dili tino kon kinsa gayod ang katigulangan nga maoy gigikanan sa ngalan sa mga Kenizihanon sanglit ang Bibliya wala maghatag ug detalye bahin niini. Ang kamatuoran nga, sa panahon ni Abram, gitala ni Jehova ang mga Kenizihanon nga lakip niadtong nag-okupar sa teritoryo nga panag-iyahon sa binhi ni Abram (Gen 15:​18, 19) dili motakdo sa panglantaw nga ang mga Kenizihanon maoy mga kaliwat ni Esau, kinsa wala pa matawo niadtong panahona.

2. Ang matinumanong si Caleb gitawag nga “anak nga lalaki ni Jepune nga Kenizihanon.” (Num 32:12; Jos 14:​6, 14) Si Jepune mahimong naggikan sa usa ka membro sa dili-Israelinhong mga Kenizihanon (Gen 15:​18, 19) kinsa nakig-uban sa mga kaliwat ni Jacob (Israel), nga nangasawa ug Israelinhon. Hinunoa, lagmit gayod nga ginganlan siyag Kenizihanon tungod kay siya naggikan sa usa ka Judeanhong katigulangan nga pangulo sa banay nga ginganlag Kenaz, nga gingalan usab sa igsoong lalaki ni Caleb.​—Jos 15:17; Huk 1:13; 1Cr 4:13.