Usa ka linalang nga manulonda nga taas ug ranggo nga may linaing mga katungdanan, nga lahi sa han-ay sa mga serapin. Ang una sa 92 ka higayon nga sila gihisgotan sa Bibliya maoy sa Genesis 3:24; human papahawaa sa  Diyos si Adan ug Eva gikan sa Eden, ang mga kerubin (Heb., keru·vimʹ) gibutang diha sa S nga ganghaan uban ang nagdilaab nga sulab sa espada “aron sa pagbantay sa dalan paingon sa kahoy sa kinabuhi.” Wala ibutyag kon kapin ba sa duha ka kerubin ang gibutang didto.

Ang mga larawan sa mga kerubin gilakip sa mga kasangkapan sa tabernakulo nga gipatindog didto sa kamingawan. Duha ka kerubin nga ginama sa sinalsal nga bulawan ang gipahimutang sa ibabaw sa isigkatumoy sa tabon sa Arka. Magkaatbang kini ug nagyukbo sa tabon nga daw nagasimba. Ang matag usa adunay duha ka pako nga gibukhad pataas ug nagpandong sa tabon nga daw nagbantay ug nagpanalipod niana. (Ex 25:10-21; 37:7-9) Dugang pa, ang pangsulod nga mga tabil sa tolda alang sa tabernakulo ug ang kortina nga nag-ulang sa Balaan gikan sa Labing Balaan binordahan ug mga larawan sa kerubin.​—Ex 26:​1, 31; 36:​8, 35.

Dili kini makahahadlok nga mga larawan nga gisundog gikan sa mga imahen sa pak-an nga mga mangtas nga ginasimba sa paganong kanasoran sa palibot, maingon sa gituohan sa uban. Sumala sa gikauyonang testimonya sa karaang Hudiyohanong tradisyon (ang Bibliya walay gisulti labot niining butanga), kini nga mga kerubin maoy pormag tawo. Kini maoy ekselenteng mga buhat sa arte, nga naglarawan sa mga linalang nga manulonda nga may mahimayaong katahom, ug gigama nga gisunod ang matag detalye “sumala sa . . . sumbanan” nga nadawat ni Moises gikan kang Jehova mismo. (Ex 25:9) Si apostol Pablo naghubit niini ingong “mahimayaong mga kerubin nga naglandong sa tabon sa pagpasig-uli.” (Heb 9:5) Kini nga mga kerubin nalangkit sa presensiya ni Jehova: “Ug akong ipakita ang akong kaugalingon kanimo didto ug mosulti kanimo gikan sa ibabaw sa tabon, gikan sa taliwala sa duha ka kerubin nga anaa ibabaw sa arka sa pagpamatuod.” (Ex 25:22; Num 7:89) Busa, si Jehova gikaingong “naglingkod ibabaw [o, taliwala] sa mga kerubin.” (1Sa 4:4; 2Sa 6:2; 2Ha 19:15; 1Cr 13:6; Sal 80:1; 99:1; Isa 37:16) Ingong simbolo, ang mga kerubin nagsilbing “larawan sa karo” ni Jehova diin siya nagsakay (1Cr 28:18), ug ang mga pako sa mga kerubin nagpanalipod ug nagpatulin sa pagpanaw. Busa si David, diha sa balaknong awit, naghubit sa katulin sa pag-abot ni Jehova aron sa pagtabang kaniya, sama sa usa nga “miabot nga nagsakay sa usa ka kerubin ug miabot nga naglupad” nga “sakay sa mga pako sa espiritu.”​—2Sa 22:11; Sal 18:10.

Ang detalyadong mga plano sa arkitektura sa halangdong templo ni Solomon naglakip sa duha ka dagkong mga kerubin diha sa Labing Balaan. Ginama kini gikan sa kahoyng oleifero nga hinaklapan ug bulawan, nga ang matag usa may gihabogong napulo ka maniko (4.5 m; 14.6 p). Kining duha parehong nag-atubang sa S nga nagbarog diha sa A-H nga direksiyon nga lagmit nahimutang diha sa kinatung-an sa lawak. Bisan tuod nagbarog nga napulo ka maniko gikan sa usag usa, ang tumoy sa usa ka binukhad nga pako sa usa ka kerubin midapat sa tumoy sa binukhad nga pako sa laing kerubin diha sa tunga sa lawak, nga naglandong sa arka sa pakigsaad ug sa mga yayongan niini, nga nahimutang sa ilalom. Ang pikas nga pako sa usa ka kerubin midapat sa A nga bungbong ug ang pikas nga pako sa ikaduhang kerubin midapat sa H nga bungbong. Busa ang mga pako sa mga kerubin milukop sa 20-ka-maniko nga gilapdon sa lawak. (Tan-awa ang TEMPLO.) Ang kinulit nga mga kerubin, nga hinaklapan ug bulawan, gidayandayan usab diha sa mga bungbong ug mga pultahan sa templo. Ang mga kilid sa tumbagang kareton sa tubig gidayandayanan usab ug mga kerubin. (1Ha 6:23-35; 7:29-36; 8:​6, 7; 1Cr 28:18; 2Cr 3:​7, 10-14; 5:​7, 8) Sa samang paagi, ang kinulit nga mga kerubin gidayandayan diha sa mga bungbong ug mga pultahan sa templo nga nakita ni Ezequiel sa panan-awon.​—Eze 41:17-20, 23-25.

Si Ezequiel nag-asoy usab ug daghang panan-awon nga niini nakita ang simbolikong mga kerubin nga talagsaon ang kahubitan. Human hisgoti kini ingong “buhing mga linalang” (Eze 1:5-28), sa ulahi iyang gipaila kini ingong “mga kerubin.” (Eze 9:3; 10:1-22; 11:22) Niining malarawanong mga panan-awon ang mga kerubin suod nga nalangkit sa mahimayaong personahe ni Jehova ug kanunay nga nag-alagad kaniya.

Sa iyang basahon sa tagna, si Ezequiel giingnan usab nga ‘magpatugbaw ug usa ka awit sa pagbangotan tungod sa hari sa Tiro,’ diin iyang gitawag ang hari nga usa ka mahimayaong nagatabon nga kerubin nga kanhi didto “sa Eden, ang tanaman sa Diyos,” apan gihuboan sa iyang katahom ug gihimong samag abo ibabaw sa yuta. “Mao kini ang giingon sa Soberanong Ginoong Jehova: . . . ‘Ikaw ang dinihogang kerubin nga nagatabon, ug ako nagpahimutang kanimo. Ikaw didto sa balaang bukid sa Diyos. Ikaw naglakaw taliwala sa nagkalayo nga mga bato. Ikaw walay-ikasaway sa imong mga dalan sukad sa adlaw sa paglalang kanimo hangtod nga ang pagkadili-matarong nakaplagan diha kanimo. . . . Ako magpapahawa kanimo ingong mahugaw gikan sa bukid sa Diyos, ug ako maglaglag kanimo, Oh kerubin nga nagatabon [“Oh nagapanalipod nga kerubin,” Vg].’”​—Eze 28:11-19.