Sa balaknong pinulongan si Job mahulagwayong naghubit kon sa unsang paagi siya giumol diha sa sabakan sa iyang inahan, nga nag-ingon ngadto sa Dakong Maglalalang: “Wala mo ba ako ibubo ingon sa gatas ug gipabagtok sama sa keso?”​—Job 10:10.

Ang paghimog keso maoy lahi gikan sa paghimog mantekilya; ang mantekilya gihimo pinaagi sa pagbatil sa gatas. Aron makahimog keso sa karaang kapanahonan, ang gatas pabagtokon dayon pinaagi sa rennet gikan sa tiyan sa hayop o pinaagi sa duga sa pipila ka dahon o mga gamot. Human mapabagtok, paawason ang likido nga bahin, ug kan-on ang bag-ong nanibuok nga gatas.

Gisugo si David sa pagdala sa “napulo ka bahin sa gatas” ngadto sa pangulo sa 1,000 nga kaniya nailalom ang iyang mga igsoon nga nag-alagad ingong mga sundalo ni Saul. (1Sa 17:​17, 18) Ang literal nga hubad niini sa orihinal maoy “napulo ka putol sa gatas,” nga lagmit nagkahulogan nga “napulo ka keso sa bag-ong gatas.” Ang Latin nga Vulgate mabasa nga “napulo ka gagmayng mga hinulma [o, molde] nga keso.” Sa panahon sa sibil nga gubat nga gisugniban ni Absalom, ang mga higala ni David nagpadala kaniya ug mga taganang pagkaon, nga naglakip sa “nanibuok nga gatas sa baka,” ug kini usab lagmit maoy humok nga mga keso.​—2Sa 17:29.