[lagmit gikan sa lintunganayng pulong nga nagkahulogang “moitom”].

Usa ka lawom nga walog nga nag-ulang sa Jerusalem gikan sa Bukid sa mga Olibo ug milatas una sa pahabagatan-sidlakan ug dayon mipaingon sa habagatan ubay sa siyudad. Walay tubig bisan sa tingtugnaw gawas sa panahon nga kusog ang pagbunok sa ulan, ang Walog sa Kidron (Nahal Qidron) nagsukad sa halayog diyutay dapit sa A sa mga paril sa Jerusalem. Sa pagsugod kini maoy usa ka lapad ug mabaw nga walog, apan kini nagkasigpit ug nagkalawom. Pag-abot niini atbang sa kanhing dapit sa templo, kini maoy mga 30 m (100 p) ang giladmon ug 120 m (390 p) ang gilapdon. Sa unahan pa dapit sa H, ang Walog sa Kidron misumpay sa Walog sa Tyropoeon ug sa Walog sa Hinnom. Gikan didto kini mipadayon pahabagatan-sidlakan tabok sa umaw nga Kamingawan sa Juda ngadto sa Patayng Dagat. Ang modernong ngalan nga gigamit alang sa ubos nga bahin sa walog maoy Wadi en-Nar (nagkahulogang “Lugot sa Kalayo”), nga nagpakitang kini maoy init ug uga halos sa tanang panahon.

Sa atbang sa Jerusalem, ang mga lubnganan nga gikalot diha sa bato nahimutang sa titip ug batoong mga bakilid sa S nga kiliran sa walog. Sa K nga kiliran niini, mga tungatunga tali sa kanhing dapit sa templo ug sa kinasang-an sa mga walog sa Tyropoeon ug Kidron, anaa ang tubod sa Gihon. (Tan-awa ang GIHON Num. 2.) Dili layo niini nga tubod, ang Walog sa Kidron milapad ug nahimong usa ka patag nga dapit. Gituohan nga kining patag nga dapit lagmit mao ang karaang “tanaman sa hari.”​—2Ha 25:4.

Si Haring David, sa dihang mikalagiw gikan sa rebeldeng si Absalom, mitabok nga nagbaktas sa Walog sa Kidron. (2Sa 15:​14, 23, 30) Tungod sa iyang pagtunglo kang David niadtong higayona, si Simei sa ulahi gidid-an ni Solomon sa pag-adto sa Jerusalem ug wala tugoting motabok sa Walog sa Kidron aron dili silotan sa kamatayon. (1Ha 2:​8, 9, 36, 37) Gitadlas ni Jesus ang samang walog sa iyang pagpaingon sa tanaman sa Getsemane. (Ju 18:1) Panahon sa paghari ni Haring Asa, Ezequias, ug Josias sa Juda, ang Walog sa Kidron gigamit ingong usa ka dapit sa paglaglag sa mga butang nga nalangkit sa idolatriya. (1Ha 15:13; 2Ha 23:​4, 6, 12; 2Cr 15:16; 29:16; 30:14) Gigamit usab kini ingong lubnganan. (2Ha 23:6) Kini naghimo sa Walog sa Kidron nga usa ka mahugaw nga dapit, ug busa hinungdanon nga ang tagna ni Jeremias nagpunting sa usa ka panahon sa dihang, sa kasukwahi, “ang tanang hinagdang uma hangtod sa bul-oganang walog sa Kidron . . . mamahimong balaan alang kang Jehova.”​—Jer 31:40.