Bulawan nga galamiton nga gigamit alang sa mga lampara diha sa ibabaw sa mga sanga sa tangkawan sa tabernakulo o sa mga tangkawan sa templo sa Israel. (Ex 25:​37, 38; 37:23; Num 4:9; 1Ha 7:​48, 49; 2Cr 4:19-21) Ang mga kimpit gipaila sa doble nga Hebreohanong pulong nga mel·qa·chaʹyim, nga naggikan sa lintunganayng pulong nga nagkahulogang “kuha.” Ang paggamit sa dobleng porma dinhi nagtumong sa usa ka himan nga lagmit may duha ka bahin. Busa, diha sa Isaias 6:6 ang mel·qa·chaʹyim nagtumong sa “kumpit” nga gigamit sa usa ka serapin sa pagkuhag nagbaga nga uling gikan sa halaran.

Adunay kalainan tali sa “mga kimpit” ug “mga igpapalong” sa tangkawan nga gigamit diha sa templo. (1Ha 7:​49, 50; 2Cr 4:​21, 22) Bisan tuod wala hubita diha sa Kasulatan, kini lagmit mao ang mga kumpit nga gigamit sa paghawid sa sunog nga mga pabilo sa mga lampara, samtang ang mga igpapalong lagmit maoy samag-gunting nga mga galamiton nga gigamit sa pagputol sa sunog nga bahin sa mga pabilo. Diha sa tabernakulo, kini  nga mga pinutol, nga hawiran pinaagig mga kimpit, gisulod diha sa mga insensaryo, dayag nga mga sudlanan alang niining sunog nga mga pabilo sa dili pa kini ilabay.​—Ex 37:23.