[Lungsod sa Kalasangan].

Usa ka Hivihanong siyudad nga nalangkit sa mga Gabaonhon (Jos 9:17), nailhan usab nga Baala (Jos 15:9), Baale-juda (2Sa 6:2), ug Kiriat-baal (Jos 15:60). Sa ulahi ang Kiriat-jearim napanag-iya sa Juda ug nahimong utlanan niini sa teritoryo sa Benjamin. (Jos 15:​1, 9; 18:​11, 14; Huk 18:12) Lagmit nga ang mga kaliwat ni Juda pinaagi ni Caleb nanimuyo didto.​—1Cr 2:​3, 50, 52, 53.

Sa ika-12 nga siglo W.K.P., human iuli sa mga Filistehanon ang Arka, kini gidala ngadto sa Kiriat-jearim tungod sa hangyo sa mga tawo sa kasikbit nga Bet-semes. Lagmit nga kini nagpabilin didto hangtod nga kini gibalhin ni Haring David ngadto sa Jerusalem mga 70 ka tuig sa ulahi.​—1Sa 6:20–​7:2; 1Cr 13:​5, 6; 16:1; 2Cr 1:4.

Ang katalirongan ni Jeremias nga si manalagnang Uriyas maoy anak nga lalaki ni Semaias nga taga-Kiriat-jearim. (Jer 26:20) Ang mga kaliwat niadtong nagpuyo kanhi sa siyudad may mga hawas usab taliwala niadtong namalik gikan sa pagkadestiyero sa Babilonya.​—Esd 2:​1, 2, 25; Neh 7:​6, 7, 29.

Ang Deir el-ʽAzar (Tel Qiryat Yeʽarim) mao ang dapit nga sagad giingon nga katumbas sa kahubitan sa Bibliya sa Kiriat-jearim ingong usa ka siyudad sa bukirong rehiyon (Jos 15:​48, 60) diha sa utlanan tali sa Juda ug Benjamin nga kasikbit sa ubang mga siyudad sa Gabaon. Kini nga dapit maayong pagkahimutang ibabaw sa usa ka bungtod nga mga 14 km (8.5 mi) sa SAS sa Bet-semes ug mga 13 km (8 mi) sa KAK sa Jerusalem. Kini nga lokasyon halos tukma sa kon unsay pangagpas ni Eusebius. Kas-a giingon niya nga ang Kiriat-jearim maoy 9 ka Romanhong milya (13 km; 8 mi) gikan sa Jerusalem, ug sa laing higayon gihubit niya kini ingong 10 ka Romanhong milya (15 km; 9 mi) gikan niini. Dugang pa, tungod kay ang Deir el-ʽAzar nahimutang sa kanhi bagag kakahoyan nga rehiyon, kini mohaom kaayo sa ngalang Kiriat-jearim, “Lungsod sa Kalasangan.”