Ang mga kiting sa upat ug tiil nga mga hayop mao ang mga ugat luyo sa buolbuol sa pangulahing mga tiil niini. Ang pagkiting, ang pagputol niini nga mga ugat, magpabakol sa hayop ug maghimo niining dili na magamit sa trabaho o sa gubat. Ang pagkamabuotbuoton sa mga anak nga lalaki ni Jacob nga si Simeon ug Levi gipahayag diha sa ilang pagkiting sa mga torong baka, lagmit sa dihang nanimalos sa mga Hivihanon sa Sekem. (Gen 49:​5, 6) Sa ilang pagpakiggubat, ang mga Israelinhon nagkiting sa mga kabayo sa ilang mga kaaway; sa usa ka higayon si Josue espesipikong gisugo ni Jehova nga himoon kini. (Jos 11:​6, 9; 2Sa 8:​3, 4; 1Cr 18:​3, 4) Mao kini ang kinasayonang paagi aron dili na magamit sa gubat ang mga kabayo, ug human mabaldado niini nga paagi, walay duhaduha nga ang mga kabayo patyon, laglagon uban sa mga karong iggugubat. Pinaagi sa dili nila pagkuha sa mga kabayo sa ilang mga kaaway ug sa paggamit niini sa gubat, ang mga Israelinhon mapanalipdan gikan sa lit-ag sa pagsalig sa mga kabayo inay sa pagsalig sa panalipod ni Jehova.​—Itandi ang Deu 17:16; Isa 31:​1, 3.