[Heb., peʹthen].

Usa ka malala kaayong bitin sa Asia ug Aprika. Ang kobra nga gihisgotan sa unom ka teksto sa Bibliya sa walay duhaduha mao ang Ehiptohanong kobra o bitin (Naja haje), usa nga sagad gigamit maylabot sa pagpanglamat sa bitin sa kapanahonan sa Bibliya ug karong adlawa. Sama sa kasagarang kobra sa India ug sa haring kobra sa Asia, ang Ehiptohanong kobra magpabukad sa liog niini sa dihang masuko.

Ang kobra mokalit paghasmag pinaagi sa gituyhakaw nga lawas niini uban ang paghagishis. Inigpaak, ang apapangig sa kobra moukob pag-ayo ug moduot pa sa pagpaak aron maseguro nga ang igong gidaghanon sa lala makasulod sa gipaakan. Tungod niini ug tungod sa hilabihang kalala, ang mga kobra maoy lakip sa labing peligroso sa tanang linalang.

Ang mga Israelinhon sinati kaayo niini nga bitin, dili lamang sa dihang sila didto pa sa Ehipto kondili usab sa panahon sa ilang paglatagaw latas sa kamingawan. Si Moises, sa dihang namulong sa mga Israelinhon didto sa kamingawan, naghisgot sa lala sa kobra ingong “mabangis nga hilo sa mga kobra.” (Deu 32:33) Ang terminong “mabangis” tukmang naghubit sa epekto sa lala sa kobra. Labot sa epekto niini, si Findlay Russell, M.D., diha sa iyang librong Snake Venom Poisoning (1980, p. 362), nag-ingon nga ang mga simtoma magsugod sa pagluyloy sa mga tabontabon, ug sundan kini sa kalisod sa pagginhawa, pagkaparalisar sa mga mata, sa dila, ug sa tutonlan ug lagmit maglakip pa ug mga kombulsiyon ug atake sa kasingkasing.

Ang lala sa kobra moatake sa mga nerbiyos, makaparalisar sa sistema sa respiratoryo, ug sagad nga makapatay sa tawo, gawas kon dapatan dayon ug pangontra sa lala. Si Zopar naghisgot ug “apdo sa mga kobra” ug “lala sa mga kobra.”​—Job 20:​14, 16.

Sa mahulagwayong pagkasulti, gilangkit sa salmista ang makamatay nga kobra ug ang leyon ug  miingon maylabot kanilang misalig kang Jehova: “Pagatumban mo ang nating leyon ug ang kobra; pagayatakan mo ang may-lambungay nga nating leyon ug ang dakong bitin.” (Sal 91:13) Si Isaias, sa paghisgot sa pagtigom pag-usab sa katawhan ni Jehova, nagtagna bahin sa nabag-o nga mga kahimtang alang kanila, nga naghubit sa usa ka panahon sa dihang “ang bata nga masuso magadula sa lungag sa kobra; ug ang usa ka bata nga linutas mokuot sa buho nga lutsanan sa kahayag sa malalang bitin.”​—Isa 11:​8, 11, 12.

Sa unsang paagi ang usa ka kobra “magpatalinghog sa tingog sa mga maglalamat”?

Ang Bibliya naghisgot sa dalunggan sa kobra ug nagpunting sa katakos sa kobra nga “magpatalinghog sa tingog sa mga maglalamat.” (Sal 58:​4, 5) Sanglit ang mga bitin walay mga dalunggan sa gawas ug giisip sa mga biologo nga kini daw dili makadungog, daghan ang nagtuo nga bungol kini nga mga reptilya. Sa pagkomento labot niining sayop nga hunahuna, ang The New Encyclopædia Britannica (1987, Tomo 27, p. 159) nag-ingon: “Kini nga pangagpas dili husto; ang mga bitin maoy sensitibo sa pipila ka dala sa hangin nga mga tingog ug makadungog niini pinaagi sa usa ka mekanismo nga nagsilbing kapuli sa tympanic membrane [o, saminsamin sa dalunggan]. . . . Dugang pa, bisan tuod ang pagkasensitibo sa kadaghanang bitin sa hinay nga tingog maoy ubos kay sa nianang sa kadaghanang matang sa mga dalunggan, dili gayod kini babag. Apan, ang ubang mga bitin maoy sensitibo sama sa pagkasensitibo sa kadaghanang mga reptilya nga may ordinaryong matang sa mga dalunggan ug sa mga mekanismo sa tungang dalunggan.”