Ang Gregong pulong nga khi·liʹar·khos (chiliarch) nagkahulogang “komandante sa 1,000 ka sundalo.” Gawas sa paggamit niini diha sa Pinadayag, kini nagtumong sa usa ka tribuno (usa ka opisyal) sa Romanhong kasundalohan. Adunay unom ka tribuno sa matag Romanhong lehiyon. Apan, ang lehiyon wala bahina ngadto sa unom ka lainlaing komandante; hinunoa, ang matag tribuno nagmando sa tibuok lehiyon sulod sa duha ka bulan sa usa ka tuig. Sa matag duha-ka-bulan nga yugto, duha ka tribuno ang mag-alagad nga sal-angsal-ang sa matag adlaw.​—Tan-awa ang KASUNDALOHAN, PANON (Romanhon).

Kini nga komandante militar gitugyanan ug dakong awtoridad. Siya ang nagtudlo ug nag-asayn sa mga senturyon. Siya ang nagdumala sa mga hukmanan alang sa mga sundalo ug makapakanaog ug silot nga kamatayon. Aduna siyay hugpong sa mga tig-alagad nga nagsilbing mga katabang. Ang iyang ranggo mailhan pinaagi sa iyang besti: usa ka purpurang budlis diha sa iyang toga ug usa ka linaing singsing nga bulawan. Dihay panahon nga kini nga mga tribuno gipili sa katawhan; sa ulahi ang Senado ug ang ubang mga kawani nga sibil ug militar mao ang pangunang responsable sa ilang pagkatudlo. Sagad nga ang gikinahanglan mao kadtong nakaserbisyo nag napulo ka tuig sa infantry o ingong nagbaktas nga sundalo o kaha lima ka tuig ingong mangangabayo nga sundalo. Si Agusto nagtugot sa mga anak nga lalaki sa mga senador nga magsugod sa ilang mga karera ingong mga tribuno. Apan buot ni Tiberio nga siya mao lamang ang maghupot sa katungod sa pagtudlo sa maong mga posisyon.

Sa pagsaulog sa adlawng natawhan ni Herodes kini nga mga komandante maoy lakip sa pinasidunggang mga dinapit nga gilingaw sa mananayaw nga si Salome. Sa presensiya niini nga mga tawong de-ranggo, napugos si Herodes sa pagtuman sa iyang panumpa ug busa mimando sa pagpunggot sa ulo ni Juan nga Tigbawtismo. (Mar 6:21-26) Ang usa ka komandante militar (chiliarch) miuban sa mga sundalo nga midakop kang Jesus.​—Ju 18:12.

Niadtong mga 56 K.P., si Claudio Lisias mao ang komandante militar sa garison nga didto sa Jerusalem. Siya mao ang nagluwas kang Pablo gikan sa magubtanong panon sa dalan ug gikan sa nagkagubot nga Sanhedrin ug kinsa misulat ug usa ka sulat sa pagpatin-aw ngadto kang Gobernador Felix sa dihang si Pablo sekretong gipabiya paingon sa Cesarea. (Buh 21:30–​24:22) Daghang komandante militar ang presente sa dihang si Pablo miatubang kang Herodes Agripa II.​—Buh 25:23.

Ang “mga komandante militar” gihisgotan usab diha sa panan-awon ni Juan, sa basahon sa Pinadayag, ingong lakip niadtong gipahamtangan sa mga paghukom sa Diyos.​—Pin 6:15; 19:18.