Ang Bibliya wala maghubit niini nga mga kombira sa gugma ni nagpaila kon unsa ka subsob kini gihimo. (Jud 12) Wala kini isugo ni Ginoong Jesu-Kristo o sa iyang mga apostoles, ug dayag nga kini dili pagaisipon nga obligadong sundon o permanente. Ang pipila nag-ingon nga kini maoy mga okasyon sa dihang ang adunahan nga mga Kristohanon nag-andam ug mga bangkete diin gidapit ang ilang kabos nga mga isigkamagtutuo. Sa tingob, ang mga ilo-sa-amahan, mga babayeng balo, mga adunahan, ug ang mga kabos nag-ambitay sa usa ka dagayang lamesa diha sa espiritu sa panag-igsoonay.

Si Tertullian, usa ka magsusulat sa ikaduha ug ikatulong siglo, naghubit bahin sa mga kombira sa gugma, nga nag-asoy nga ang mga mitambong, una pa molingkod aron mokaon, nag-ampo sa Diyos. Sila mokaon ug moinom sa kasarangang paagi, aron igo lang makatagbaw sa kagutom ug kauhaw, nga maghinumdom nga bisan sa kagabhion sila kinahanglang mosimba sa Diyos. Ang ilang panagsultihanay maoy sama niadtong kinsa nahibalo nga ang Ginoo namati. Ang matag usa moawit ug usa ka awit, ug ang kombira taposon pinaagi sa pag-ampo.​—Apology, XXXIX, 16-18.

Ang pamatuod nga kini nga mga kombira sa sinugdan gihimo uban ang maayong tumong gipakita pinaagi sa pulong nga gigamit sa paghubit niini​—a·gaʹpe. Ang a·gaʹpe mao ang Gregong pulong nga gigamit alang sa kinatas-ang matang sa gugma, gugma nga gipasukad sa prinsipyo. Mao kini ang matang sa gugma nga giingon sa Bibliya nga ang ‘Diyos mao.’ (1Ju 4:8) Kini gitala ingong bunga sa espiritu diha sa Galacia 5:22 ug gihubit nga detalyado diha sa 1 Corinto 13:4-7.

Dili ang Panihapon sa Ginoo. Daw walay pasukaranan nga ilangkit ang maong mga kombira sa gugma uban sa Panihapon sa Ginoo (Memoryal), ingon sa gihimo sa pipila, nga nag-ingong ang mga kombira sa gugma gihimo sa wala pa o human sa pagsaulog sa Memoryal. Ang Panihapon sa Ginoo maoy usa ka kasumaran nga himoon matag tuig sa sama nga adlaw, sa ika-14 nga adlaw sa lunar nga bulan sa Nisan, samtang ang mga kombira sa gugma mopatim-awng kanunayng gihimo ug dili kinahanglang himoon sa samang tinakdang panahon. Human sa pagsaway sa mga kasaypanan nga mitungha maylabot sa pagdala sa ilang mga panihapon ngadto sa dapit diin saulogon ang Panihapon sa Ginoo, si Pablo misulat: “Tino nga kamo may mga balay nga didto mokaon ug moinom, dili ba? . . . Kon adunay gigutom, pakan-a siya sa balay.” (1Co 11:​22, 34) Kini maoy usa ka gabii nga pagasaulogon uban ang kaugdang ug pagpamalandong sa kahulogan niini ug dili usa ka okasyon sa pagkaon ug pag-inom diha sa tigomanan.

Ni kini nga mga kombira sa gugma sama ra sa “mga pagpangaon” (“pagpikaspikas sa tinapay,” KJ) nga gihisgotan sa Buhat 2:​42, 46; 20:7. Ang tinapay niadtong panahona kasagaran nigpis. Ang tinapay nga walay lebadura kagumkom usab. Ang tinapay dili hiwaon, kondili pikaspikason, nga gumikan niana mitungha ang prase nga “pagpikaspikas sa tinapay,” nga sagad nagtumong sa ordinaryong pagpangaon.​—Buh 2:​46, KJ, itandi ang NW.

Giabusohan sa Pipila. Ingong usa ka literal nga pagpangaon, ang mga kombira sa gugma giabusohan niadtong walay tukmang espirituwal nga panglantaw. Sanglit kini wala isugo ni Ginoong Jesu-Kristo o sa iyang mga apostoles kondili maoy kostumbre lamang, kini sa ulahi nahunong. Ang mga pulong ni Judas nagpakita nga ang pipila nga nakig-uban niini nga mga okasyon adunay daotang mga motibo: “Kini mao ang mga bato nga natago ilalom sa tubig diha sa inyong mga kombira sa gugma samtang sila nangombira uban kaninyo, mga magbalantay nga nagpakaon sa ilang kaugalingon nga walay kokahadlok.” (Jud 12) Gipakita ni Pedro ang pagyuhot sa mga mamumuhat ug daotan ug niadtong nagtudlo ug bakak nga doktrina taliwala sa tinuod nga mga Kristohanon, nga nag-ingon: “Ilang giisip ang maluhong pagkinabuhi sa maadlaw nga usa ka kalipayan. Sila maoy mga buling ug mga lama, nga nagpatuyang sa pagkalipay sa ilang malimbongong mga pagtulon-an samtang nangombira uban kaninyo.” (2Pe 2:13) Bisan tuod ang mga Kristohanon kaniadto ug hangtod karon nagpadayon sa pagpahimulos sa makapalipayng panag-ubanay ug nagtinabangay sa usag usa sa materyal nga paagi kutob sa ilang mahimo, walay pasukaranan nga saulogon pag-usab ang mga kombira sa gugma ingong usa ka kostumbre diha sa Kristohanong kongregasyon.​—San 1:27; 2:15.