KON UNSA ANG UNOD NIINI NGA PUBLIKASYON

Ang katuyoan niini nga publikasyon mao ang pagtabang kanimo nga makabaton ug hait nga pagsabot sa Kasulatan. Giunsa kini paghimo? Gihugpong niini ang mga detalye gikan sa tanang bahin sa Bibliya nga nalangkit sa mga ulohan nga gihisgotan. Gipakita niini kon unsang mga pulonga ang gigamit sa orihinal nga pinulongan ug unsa ang literal nga kahulogan niini. Gihisgotan niini ang nalangkit nga impormasyon gikan sa sekular nga kasaysayan, sa arkeolohikanhong panukiduki, ug sa ubang mga natad sa siyensiya ug gisusi kini sumala sa panglantaw sa Bibliya. Gitagana niini ang mga visual aid o ilustrasyon. Tabangan ka niini nga masabtan ang kahinungdanon sa paglihok sumala sa kon unsay giingon sa Bibliya.

Ang Bibliya naghisgot bahin sa mga pagpakiglabot ni Jehova nga Diyos sa katawhan diha sa paagi nga nagpabanaag gayod sa tinuod nga panghitabo sa kinabuhi. Kini naghisgot sa mga tawo ug mga dapit, sa mga nasod ug mga magmamando nga naglungtad sa samang panahon, ug sa partikular nga mga matang sa mga tanom ug mga hayop. Ang kahibalo labot niini makatabang kanimo nga makabenepisyo pag-ayo sa mga paghisgot sa Bibliya sa maong mga tawo ug mga butang. Aron sa pagtabang kanimo, ang Pagtugkad sa Kasulatan naundan ug matulon-anong mga artikulo bahin sa kapin sa 3,000 ka tawo nga gihisgotan sa Kasulatan ingon man mga impormasyon labot sa 97 ka nasod, mga tribo, ug mga katawhan. Kini adunay kapin sa 1,000 ka artikulo nga naghisgot sa espesipikong mga dapit, kapin sa 90 ka artikulo nga naghisgot bahin sa nagkalainlaing mga tanom, ug kapin sa 100 ka artikulo nga naghisgot sa mga langgam ug mga hayop. Gawas pa niini, adunay mga artikulo nga naghisgot sa daghang uban pang hinungdanong mga ulohan sa Kasulatan.

Ang matag basahon sa Bibliya gihatagan ug linaing pagtagad. Usa ka sumaryo sa matag basahon ang naghatag ug pagtagad sa pangunang mga ideya nga gitagik sa magsusulat, ug kini sayon nga basahon ug daling mahinumdoman. Gawas kon gipaila, ang hubad sa Bibliya nga gikutlo niini nga reperensiyang basahon mao ang Bag-ong Kalibotang Hubad sa Balaang Kasulatan, bisan tuod nga may kapin sa 40 ka uban pang mga hubad ang gisitar ug gikutlo usab.

Ang mga visual aid o ilustrasyon naglakip sa daghang mapa, nga ang kadaghanan niini nagpasiugda sa hinungdanong mga dapit pinasukad sa makasaysayanhong mga yugto sa panahon. Adunay daghang hulagway usab aron makatabang kanimo sa paghanduraw sa mga kayutaan sa Bibliya ug sa mga panghitabo nga nahitabo didto. Ang pipila niini maoy mga paghulagway sa mga dibuhista bahin sa hinungdanong mga panghitabo sa kasaysayan. Ang uban pa maoy mga hulagway sa partikular nga mga dapit ug sa mga displey sa mga museyo nga nalangkit sa rekord sa Bibliya. Ang mga pasalamat alang sa gikuhang mga hulagway gikan sa mga displey sa museyo ug sa uban pang mga hulagway gipakita sa Tomo 2, sa panid 1468.

Ang detalyadong mga artikulo naghisgot sa Hebreohanon, Grego, ug Aramaiko​—mga pinulongan nga orihinal nga gigamit sa dihang gisulat ang Bibliya. Gitagik ang mga artikulo pinasukad sa kahulogan sa hinungdanong mga termino diha sa orihinal nga mga pinulongan, ug dili lamang sa kon unsay pagsabot niini nga mga termino diha sa ubang mga pinulongan nga kasagarang gigamit karong adlawa. Niini nga publikasyon, ang kahulogan sa mga ngalan nga gihisgotan sa Bibliya gipasukad sa kon unsa nga paagi aktuwal nga gigamit diha sa ubang mga teksto sa Bibliya ang mga bahin sa maong mga ngalan diha sa orihinal nga pinulongan.

Unsaon nimo pagpangita sa mga tubag sa imong mga pangutana sa Bibliya? (1) Ang kahulogan ba sa usa ka partikular nga ekspresyon sa Bibliya ang buot nimong mahibaloan? Ang imo bang pangutana maoy maylabot sa usa ka tawo, sa usa ka dapit, o tingali sa usa ka hiyas? Hinumdomi nga ang tanang artikulo gihan-ay nga alpabetikanhon ug ang mga ngalan ug mga ekspresyon sa Bibliya gibase sa hubad sa Bag-ong Kalibotang Hubad. Pangitaa ang artikulo nga naghisgot sa ngalan o ulohan nga imong gihunahuna. Kon dili nimo makita ang artikulong imong gikinahanglan, tan-awa ang Indise sa Ulohan sa likod nga bahin sa Tomo 2; kini nagpunting sa hinungdanong materyal nga lagmit anaa sa dapit nga wala nimo hunahunaa. (2) Kon gikinahanglan nimo ang katin-awan sa usa ka espesipikong teksto, tan-awa lamang ang Indise sa Kasulatan diha sa Tomo 2.

Tim-os namong tinguha nga kini nga publikasyon magpalalom sa imong pagpabili sa Awtor sa Bibliya, si Jehova nga Diyos, ug kini mohatag kanimo ug mas lalom nga pagsabot sa kahulogan sa iyang Pulong, ug mopalihok kini kanimo nga mas bug-os pang ipadapat diha sa imong kinabuhi ang mga unod niini ug ipaambit ang hinungdanong mga kamatuoran niini ngadto sa uban.