Kining terminoha gigamit sa Job 9:9; 38:31; ug Amos 5:8 nga nagtumong sa usa ka konstelasyon sa langit. Kini sagad gituohan nga nagtumong sa Pleiades, usa ka grupo sa mga bituon nga may pito ka dagkong mga bituon ug gagmayng uban pa, nga nalukop sa samag gabon nga butang ug nahimutang sa gilay-ong mga 380 ka light-year gikan sa adlaw. Diha sa Job 38:31 si Jehova nangutana kang Job kon siya makahimo ba ‘sa paghigot nga hugot sa mga bugkos sa konstelasyong Kima,’ ug gituohan sa uban nga nagtumong kini sa pagkadasok sa hugpong sa Pleiades, ang hugpong sa mga bituon nga lagmit makita bisag dili mogamit ug teleskopyo. Bisan tuod dili matino kining gihisgotan nga konstelasyon, ang diwa sa pangutana dayag nga nagsukna kon makahimo ba ang ubos nga tawo sa paghugpong sa grupo sa mga bituon aron kini mahimong usa ka permanenteng konstelasyon. Busa, pinaagi niining pangutanaha, gipatin-aw pag-ayo ni Jehova ngadto kang Job ang pagkaubos sa tawo kon itandi sa Unibersohanong Soberano.