Sumala sa gipatin-aw sa Marcos 7:​11, ang “korban” maoy “usa ka gasa nga gipahinungod sa Diyos.” Ang Gregong pulong dinhi nga gihubad “korban” maoy kor·banʹ, ang katumbas sa Hebreohanong pulong nga qor·banʹ, nga nagkahulogang usa ka halad. Ang qor·banʹ gigamit diha sa Levitico ug Numeros ug mapadapat ngadto sa mga halad nga adunay dugo ug nianang walay dugo. (Lev 1:​2, 3; 2:1; Num 5:15; 6:​14, 21) Kining Hebreohanong pulong gigamit usab diha sa Ezequiel 20:28 ug 40:43. Kaamgid sa Gregong pulong nga kor·banʹ mao ang kor·ba·nasʹ, nga makita diha sa Mateo 27:​6, diin ang pangulong mga saserdote gitahong nag-ingon nga dili subay sa balaod nga ang salaping gigamit sa pagbudhi nga gisalibay ni Judas ngadto sa templo kuhaon ug ihulog kini nga mga pirasong plata ngadto “sa sagradong tipiganan sa bahandi [usa ka porma sa kor·ba·nasʹ],” tungod kay kini mao “ang bili sa dugo.”

Sa panahon sa ministeryo ni Jesu-Kristo dinhi sa yuta, mitungha ang usa ka salawayon nga buhat maylabot sa mga gasa nga gipahinungod ngadto sa Diyos. Bahin niini, mahukmanong gisaway ni Jesus ang mga Pariseo ingong mga salingkapaw tungod kay ilang gipalabi ang ilang kaugalingong tradisyon kay sa balaod sa Diyos. Nangangkong nagtipig alang sa Diyos sa kon unsay gipahayag nga “korban,” ilang gihiklin ang sugo sa Diyos sa pagpasidungog sa mga ginikanan sa usa ka tawo. (Mat 15:3-6) Ang usa ka tawo tingali yanong moingon, ‘Korban kini,’ maylabot sa iyang kabtangan o sa usa ka bahin niini. Gitudlo sa mga Pariseo nianang panahona nga sa dihang gipahayag na sa usa ka tawo ang iyang mga kabtangan ingong “korban,” o usa ka gasa nga gipahinungod ngadto sa Diyos, dili niya kini magamit aron sa pagtagana sa mga panginahanglan sa iyang mga ginikanan, bisag unsa pa sila ka kabos, apan siya makagamit niini nga mga kabtangan alang sa iyang kaugalingon hangtod sa iyang kamatayon kon buot niya kining buhaton. Busa, bisan tuod kini nga mga Pariseo nangangkon nga nagpasidungog sa Diyos, ang ilang mga kasingkasing wala mahiuyon sa iyang matarong nga mga kinahanglanon.​—Mar 7:9-13.

Ang historyador nga si Josephus naglangkit sa “korban” ngadto sa mga tawo, nga nag-ingon: “Kadtong nagtawag sa ilang kaugalingon ingong ‘Korban’ ngadto sa Diyos​—nagpasabot sa kon unsay naandang pagtawag sa mga Grego sa ‘usa ka gasa’​—sa dihang buot mapahigawas niini nga obligasyon kinahanglang magbayad ngadto sa mga  saserdote ug usa ka tinong kantidad.” (Jewish Antiquities, IV, 73 [iv, 4]) Hinunoa, ang terminong “korban” mas sagad nga gigamit alang sa kabtangan nga gipahinungod ingong usa ka gasa ngadto sa Diyos.