Mga substansiya o mga tambal nga gigamit alang sa nawong o sa ubang mga bahin sa lawas sa tawo aron mabag-o ang iyang dagway, aron sa pagpatahom, o aron mahimo siyang mas madanihon. Ang maong mga kosmetiko mahimong gamiton alang sa panit, sa mga kuko, o sa buhok. Ang pulong nga “kosmetiko” maoy katumbas sa Gregong pulong nga ko·sme·ti·kosʹ, nga nagkahulogang “batid sa pagdayandayan.”

Dihay mga tighimog mga pahumot ug mga tigsagol ug mga pahumot taliwala sa mga Israelinhon (Ex 30:25; 1Sa 8:13; Neh 3:8), ug ang mga pahumot kaylap nga gigamit, nga tingali labaw pa kay sa ubang mga kosmetiko. Ang pahumot nga sinagolag lana gigamit alang sa panit o sa buhok panahon sa init nga klima aron mamenosan ang kauga. Ang usa ka babayeng makasasala kas-a naghaplas sa mga tiil ni Jesus pinaagi sa maong lana. (Luc 7:​37, 38) Dugang pa, pipila ka adlaw una pa mamatay si Jesus, si Maria, ang igsoong babaye ni Lazaro, ‘miabot nga may sudlanang alabastro sa pinahumotan nga lana, lunsay nga nardo, nga mahal kaayo,’ ug nagbubo niini kaniya.​—Mar 14:3; Ju 12:3; Mat 26:​6, 7; tan-awa ang PAHUMOT.

Sa dihang si Jehu miadto sa Jezreel, si Jezebel, dugang pa sa pagpatahom sa iyang buhok o sa pagpatahom sa iyang ulo, ‘nagpintal sa iyang mga mata ug itom nga pintal.’ (2Ha 9:30) Dihay pipila ka babaye sa Israel, sama sa mga babaye sa ubang kayutaan sa Tungang Sidlakan sa kakaraanan, nga migamit ug pintal sa mata. (Eze 23:40) Ang pintal sa mata sagad itom, nga ang maong bulok motugbang sa puti sa mata ug magpadako tan-awon sa mga mata. (Jer 4:30) Ang mga paghisgot sa Kasulatan labot sa pagpintal sa mata wala maglangkit niini nga buhat ngadto sa matinumanong mga babaye sa Israel sa katibuk-an, bisan tuod nga ang usa sa mga anak nga babaye ni Job ginganlan ug Keren-hapuk, nga lagmit nagkahulogang “Sungay sa Itom nga Pintal (sa Mata) [nga mao, usa ka sudlanan sa galamiton sa pangpaanyag].”​—Job 42:14.

Wala hukmi sa Kasulatan ang makasaranganon ug timbang nga paggamit sa mga kosmetiko ug mga butang nga gigamit sa pagdayandayan. Apan, si Pablo ug Pedro nagtambag sa Kristohanong mga babaye sa pagdayandayan sa ilang kaugalingon “uban ang pagkamakasaranganon ug maayong panghunahuna, . . . sa paagi nga nahiangay sa mga babaye nga nagpaila nga masimbahon sa Diyos,” ug maghimo sa ilang dayandayan nga mao ang “natago nga pagkatawo sa kasingkasing pinaagi sa dili-madunot nga sapot sa malinawon ug malumong espiritu, nga dakog bili sa mga mata sa Diyos.” (1Ti 2:​9, 10; 1Pe 3:​3, 4) Ug, sa inspiradong paghatag ug bili sa maayong asawa, kini haom nga giingon: “Ang pagkamadanihon mahimong malimbongon,  ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.”​—Pr 31:30.