Ang kristal nga gigamit sa Bibliya nagtumong sa usa ka tin-aw, sihag nga mineral, nga lagmit usa ka matang sa kuwarso nga gitawag karong adlawa nga batong kristal. Ang batong kristal maoy usa ka matang sa kuwarso nga lunsay kaayo, nga gilangkoban sa silicon ug oksiheno. Sagad unom-ug-kilid ang porma niini nga makaplagan sa halos tanang matang sa bato ug walay kolor, tin-aw, ug sama sa bildo. Ang batong kristal mas gahi pa kay sa ubang komon nga mga minerales, ug usahay tabason aron himoong mga mutya.

Ang pamatuod nga ang “batong kristal” (Heb., ga·vishʹ) bililhon kaayo sa adlaw ni Job makita sa iyang pagtamod niini nga sama kabililhon sa korales ug mga perlas, apan bisan pa niana iyang giisip kining tanan nga ubos ug bili kay sa kaalam. (Job 28:18) Ang Pinadayag migamit sa tin-aw, naggilakgilak, lunsay nga kristal (Gr., kryʹstal·los) sa paghubit sa “usa ka dagat nga bildo nga sama ug kristal,” sa sidlak sa balaang siyudad, ang Bag-ong Jerusalem, nga ingon sa “usa ka batong haspe nga naggilakgilak nga sama katin-aw sa kristal,” ug sa “usa ka suba sa tubig sa kinabuhi, ingon katin-aw sa kristal.”​—Pin 4:6; 21:11; 22:1.