Ang tudlo sa kamot sa tawo nga ikahikap sa matag usa sa ubang mga tudlo. Ang mga tawo makahawid ug mga butang ug makahimog daghang mga buhat nga nanginahanglag kahanas ug pag-amping nga dili arang mahimo kon sila walay mga kumagko. Sa kakaraanan, usahay ang usa ka binihag himoong inutil alang sa serbisyo militar pinaagi sa pagputol sa iyang mga kumagko sa kamot ug sa tiil.​—Huk 1:​6, 7.

Ang Hebreohanong pulong nga boʹhen parehong gigamit alang sa kumagko sa kamot ug sa tiil; ang kumagko nga gitumong sa pulong nga boʹhen sa dihang kini hisgotan sa usa ka teksto mailhan pinaagi sa kaubang ekspresyon nga ‘sa kamot’ ug ‘sa tiil.’ Sa matag higayon nga hisgotan ang kumagko diha sa Kasulatan, ang kumagko sa tiil gihisgotan usab sa maong teksto.​—Ex 29:20; Lev 14:​14, 17, 25, 28.

Sa panahon sa pagpahiluna-sa-katungdanan kang Aaron ug sa iyang mga anak nga lalaki ingong mga saserdote, ang usa ka laking karnero giihaw, ug si Moises nagbutang sa dugo niini ibabaw sa langodngod sa tuong dalunggan ni Aaron, sa kumagko sa iyang tuong kamot, ug sa kumagko sa iyang tuong tiil. Dayon iyang gihimo ang samang butang ngadto sa matag usa sa mga anak nga lalaki ni Aaron. (Lev 8:​23, 24) Ang dugo diha sa tuong kumagko mahulagwayong naglarawan nga sila angayng maghimo sa ilang mga buluhaton ingong saserdote kutob sa ilang maarangan.