Usa ka ekspresyon nga makita diha sa Roma 13:1 nga nagtumong sa mga awtoridad sa tawhanong kagamhanan. Kini nga teksto gihubad sa lainlaing paagi: “Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang sa ilang relatibong mga posisyon pinaagi sa Diyos.” (NW) “Magmasinugtanon ang tanang sakop sa nagamandong mga awtoridad, kay walay awtoridad nga dili ilalom sa pagkontrolar sa Diyos, ug namugna ang tanang nagalungtad nga mga awtoridad ilalom sa Iyang pagkontrolar.” (We) “Ang matag usa kinahanglang magmasinugtanon sa mga awtoridad sa estado, kay walay awtoridad nga nagalungtad nga walay pagtugot sa Diyos, ug ang nagalungtad nga mga awtoridad gipahimutang sa Diyos.”​—TEV.

Si Jehova nga Diyos, bisan tuod wala magmugna niini (itandi ang Mat 4:​8, 9; 1Ju 5:19; Pin 13:​1, 2), nagtugot nga molungtad ang mga awtoridad sa kagamhanan sa tawo, ug kini nagpadayon sa paglungtad tungod sa iyang pagtugot. Hinuon, kon buot niyang buhaton, si Jehova makatangtang, makagiya, o makakontrolar sa maong mga awtoridad aron sa pagpalampos sa iyang kabubut-on. Ang manalagnang si Daniel mipahayag bahin kang Jehova: “Siya nagausab sa mga panahon ug sa mga yugto sa panahon, nga nagtangtang sa mga hari ug nagpahimutang sa mga hari.” (Dan 2:21) Ug ang Proverbio 21:1 nagaingon: “Ang kasingkasing sa usa ka hari sama sa mga sapa sa tubig diha sa kamot ni Jehova. Iyang iliso kini sa bisan diin nga iyang kahimut-an.”​—Itandi ang Neh 2:3-6; Est 6:1-11.

Mga Katarongan nga Magpasakop ang mga Kristohanon. Walay katarongan nga ang mga Kristohanon makigbatok sa usa ka kahikayan nga gitugotan sa Diyos, hinuon sila adunay maayong katarongan nga magpasakop sa labaw nga mga awtoridad. Ang mga magmamando sa kagamhanan, bisan tuod sila tingali hiwi nga mga tawo, kasagarang dili mosilot sa uban tungod sa pagbuhat ug maayo, sa ato pa, tungod sa pagtuman sa balaod sa yuta. Apan ang usa ka tawo nga nangawat, nakabuno, o nakahimo sa ubang kalapasan makadahom nga makaagom ug grabeng paghukom gikan sa nagamandong awtoridad. Pananglitan, ang usa nga sad-an sa tinuyong pagbuno mahimong patyon tungod sa iyang salaod. Sanglit giawtorisahan ni Jehova nga Diyos ang silot nga kamatayon alang sa mga mamumuno human sa Lunop (Gen 9:6), ang tawhanong awtoridad, pinaagi sa pagpatay sa maglalapas sa balaod, nag-alagad ingong “ministro sa Diyos, usa ka tigpanimalos sa pagpahayag ug kapungot sa usa nga nagabuhat sa daotan.”​—Rom 13:2-4; Tit 3:1; 1Pe 2:11-17.

Ang pagpasakop sa mga Kristohanon sa labaw nga mga awtoridad maoy dili lamang tungod sa ilang katakos sa pagsilot sa mga mamumuhat ug daotan. Alang sa usa ka Kristohanon, kini maoy usa ka butang nga nalangkit ang tanlag. Siya magpasakop sa tawhanong mga awtoridad tungod kay iyang giila nga kini maoy kaharmonya sa kabubut-on sa Diyos. (Rom 13:5; 1Pe 2:13-15) Busa, ang pagpasakop sa labaw nga mga awtoridad​—sa politikanhong mga awtoridad sa kalibotan​—dili gayod mahimong bug-os. Imposible gayod nga ang usa ka Kristohanon padayong makabaton ug usa ka maayong tanlag ug makabuhat sa kabubut-on sa Diyos kon lapason niya ang balaod sa Diyos tungod kay mao kana ang gipabuhat sa politikanhong awtoridad. Tungod niini, ang pagpasakop ngadto sa labaw nga mga awtoridad kinahanglang lantawon kanunay pinasukad sa gipamulong sa mga apostoles ngadto sa Hudiyohanong Sanhedrin: “Kinahanglang among sugton ang Diyos ingong magmamando inay ang mga tawo.”​—Buh 5:29.

Sanglit ang mga awtoridad sa kagamhanan naghatag ug hinungdanong mga serbisyo aron sa pagtino sa kahilwas, seguridad, ug kaayohan sa ilang mga sakop, sila takos nga modawat ug mga buhis ug tributo bugti sa ilang mga serbisyo. Ang mga awtoridad sa kagamhanan mahimong tawgon nga “publikong mga alagad sa Diyos” tungod kay sila nagtaganag mapuslanong mga serbisyo. (Rom 13:​6, 7) Usahay ang maong mga serbisyo direktang nakatabang sa mga alagad sa Diyos, sama sa dihang si Haring Ciro nagpabalik sa mga Hudiyo ngadto sa Juda ug Jerusalem aron tukoron pag-usab ang templo. (2Cr 36:​22, 23; Esd 1:1-4) Sagad nga ang mga benepisyo mapahimuslan sa tanan gumikan sa hustong pagpalakaw sa mga awtoridad. Kini maglakip sa pagpatunhay sa legal nga sistema diin makaapelar ang mga tawo aron makabaton ug hustisya, proteksiyon batok sa mga kriminal ug sa ilegal nga magubtanong mga panon, ug uban pa.​—Flp 1:7; Buh 21:30-32; 23:12-32.

Siyempre, ang usa ka magmamando nga mag-abuso sa iyang awtoridad manubag sa Diyos. Misulat si apostol Pablo: “Ayaw kamo pagpanimalos, mga hinigugma, kondili hatagig dapit ang kapungot; kay nahisulat: ‘Akoa ang panimalos; ako magabalos, nag-ingon si Jehova.’”​—Rom 12:19; Ecc 5:8.