Ang kinasulorang lawak sa tabernakulo ug, sa ulahi, sa templo; gitawag usab nga Balaan sa mga Balaan. (Ex 26:​33, ftn sa Rbi8; 1Ha 6:16) Kini nga lawak sa tabernakulo dayag nga kuwadrado ug porma, nga ang matag usa sa tulo ka dimensiyon niini maoy napulo ka maniko (4.5 m; 14.6 p); ang mga dimensiyon sa lawak nga Labing Balaan sa templo nga gitukod ni Solomon maoy duha ka pilo kay niadtong sa tabernakulo, maong ang espasyo niini mas dako ug walo ka pilo.​—Ex 26:15, 16, 18, 22, 23; 1Ha 6:16, 17, 20; 2Cr 3:8.

Ang hataas nga saserdote mosulod sa Labing Balaan panahon lamang sa tinuig nga Adlaw sa Pagtabon-sa-Sala; walay tawo nga makasulod sa bisan unsang panahon saylo sa kortina nga nagbitay tali niini nga lawak ug sa Balaang Dapit. (Lev 16:2) Sa Labing Balaan ang hataas nga saserdote gilibotan sa mabulokong mga larawan sa mga kerubin nga giborda diha sa pangsulod nga tabon sa tabernakulo ug sa kortina. (Ex 26:1, 31, 33) Sa templo ni Solomon ang mga bungbong ug mga kisame maoy ginama sa kahoyng sedro nga gihaklapan ug bulawan, ug gikulit diha sa mga bungbong ang mga kerubin, mga hulagway sa kahoyng palma, pormag-tabayag nga mga dayandayan, ug mga bulak.​—1Ha 6:16-18, 29; 2Cr 3:7, 8.

Ang Kasulatan naghisgot nga ang hataas nga saserdote katulo mosulod sa Labing Balaan nga lawak sa Adlaw sa Pagtabon-sa-Sala: Una, sa dihang dala ang bulawan nga insensaryo nga sunoganan sa pinahumotan nga insenso, nga gibutangan ug mga baga gikan sa halaran; ikaduha, sa dihang dala ang dugo sa torong baka, ang halad-sa-sala alang sa saserdotehanong tribo; ug ang kataposan, sa dihang dala ang dugo sa kanding, ang halad-sa-sala alang sa katawhan. (Lev 16:11-15; Heb 9:6, 7, 25) Iyang iwisik ang dugo sa mga hayop nganha sa yuta atubangan sa bulawan nga arka sa pakigsaad, nga sa tabon niana anaa ang bulawan nga mga kerubin ug sa ibabaw niana nga tabon ang presensiya ni Jehova gihawasan sa usa ka panganod. (Ex 25:17-22; Lev 16:​2, 14, 15) Kana nga panganod dayag nga midan-ag ingong usa ka masanag nga kahayag, ingong ang bugtong kahayag alang niini nga lawak sa tabernakulo, diin diha niini walay tangkawan.

Samtang didto pa ang tabernakulo sa kamingawan, sa ibabaw sa Labing Balaan anaa ang usa ka panganod sa maadlaw ug usa ka haligi sa kalayo sa magabii, nga makita sa tibuok kampo sa Israel.​—Ex 13:22; 40:38; Num 9:15; itandi ang Sal 80:1.

Walay Arka sa Ulahing mga Templo. Wala masayri kon kanus-a ug ubos sa unsa nga mga kahimtang nga nahanaw ang arka sa pakigsaad. Mopatim-awng wala kini makuha sa mga Babilonyanhon sa dihang ilang giagawan ug gilaglag ang templo niadtong 607 W.K.P., kay ang Arka wala itala ingong lakip sa mga gamit sa templo nga gipangdala. (2Ha 25:13-17; Esd 1:7-11) Sa ikaduhang templo, nga gitukod ni Zorobabel, ug sa mas maluho nga templo ni Herodes, walay Arka diha sa Labing Balaan. Sa pagkamatay ni Jesus gipahayag sa Diyos ang iyang kasuko pinaagi sa pagpahinabo nga mapikas gikan sa ibabaw hangtod sa ubos ang baga, bug-at nga kortina nga nag-ulang sa Labing Balaan gikan sa Balaang Dapit. Ang mga saserdote nga nagbuhat sa ilang buluhaton didto sa Balaang Dapit nakakita sa sulod sa Labing Balaan ug nasayod gayod sila nga wala niini nga lawak ang Arka nga naghawas sa presensiya sa Diyos taliwala kanila. Kini nga buhat sa Diyos nagpamatuod nga ang mga halad sa pagtabon-sa-sala nga gitanyag sa Hudiyong hataas nga saserdote wala nay kapuslanan ug dili na kinahanglanon pa ang mga pag-alagad sa Levihanong pagkasaserdote.​—Mat 27:51; 23:38; Heb 9:1-15.

Simbolikong Paggamit. Sa Labing Balaan nga lawak sa tolda nga tagboanan, o tabernakulo, nahimutang ang arka sa pakigsaad; ang tabon niana nga Arka gitungtongan sa duha ka bulawan nga kerubin nga naghawas sa trono sa Diyos. Busa, sa mahulagwayong paagi ang Labing Balaan gigamit  sa paghawas sa puloy-anang dapit ni Jehova nga Diyos, ang langit mismo. Ang inspiradong sulat ngadto sa mga Hebreohanon naghatag kanato niini nga interpretasyon bahin niining mga butanga sa dihang gitandi niini ang pagsulod sa hataas nga saserdote sa Israel ngadto sa Labing Balaan kausa sa usa ka tuig, sa Adlaw sa Pagtabon-sa-Sala, sa pagsulod sa dakong Hataas nga Saserdoteng si Jesu-Kristo ngadto sa kon unsay gisimbolohan sa Labing Balaan, makausa sa tanang panahon pinaagi sa iyang halad alang sa mga sala. Kini nagpatin-aw: “Sa ikaduhang lawak [ang Labing Balaan] ang hataas nga saserdote lamang ang mosulod kausa sa usa ka tuig, nga may dalang dugo, nga iyang ihalad alang sa iyang kaugalingon ug alang sa mga sala tungod sa pagkawalay-alamag sa katawhan. . . . Kini nga tolda mismo maoy usa ka sambingay alang sa tinudlong panahon nga ania karon . . . Hinunoa, sa dihang si Kristo mianhi ingong hataas nga saserdote bahin sa maayong mga butang nga nahitabo na, pinaagi sa labaw ug mas hingpit nga tolda nga dili hinimog mga kamot, nga mao, dili niini nga kalalangan, siya misulod, dili, dili pinaagi sa dugo sa mga kanding ug sa toreyong mga baka, kondili pinaagi sa iyang kaugalingong dugo, makausa alang sa tanang panahon ngadto sa balaang dapit ug nakabaton sa walay kataposang kaluwasan alang kanato. Busa gikinahanglan nga ang mga hulad sa mga butang sa mga langit pagahinloan pinaagi niini [ang dugo sa mga halad nga hayop nga giwisik nganha niini], apan ang langitnong mga butang pinaagi sa mga halad nga mas maayo kay sa maong mga halad. Kay si Kristo misulod, dili ngadto sa balaang dapit nga hinimog mga kamot, nga maoy hulad sa katinuoran, kondili ngadto sa langit mismo, aron moatubang sa persona sa Diyos alang kanato.”​—Heb 9:7-12, 23, 24.

Busa si Jesu-Kristo ingong ang dakong Hataas nga Saserdote sa paagi nga sama kang Melquisedek nagtuman sa kon unsay gihimo sa kinaiyanhon lamang nga paagi sa hataas nga saserdote sa Israel sa linya ni Aaron sa dihang mosulod ngadto sa yutan-ong lawak nga Labing Balaan. (Heb 9:24) Ang espirituwal nga mga igsoon ni Kristo, ang iyang kaubang mga manununod, napalig-on sa mga pulong sa samang sulat ngadto sa mga Hebreohanon, nga “kita nga nakakalagiw na ngadto sa dalangpanan makabaton ug dakong kadasig sa pagpangupot sa paglaom nga gibutang sa atong atubangan. Kini nga paglaom nabatonan nato ingon nga angkla sa kalag, nga seguro ug malig-on, ug kini makasulod ngadto sa kinasuloran sa kortina, diin ang usa ka mag-uuna nakasulod alang kanato, si Jesus, nga nahimong hataas nga saserdote sa paagi nga sama kang Melquisedek hangtod sa kahangtoran.”​—Heb 6:18-20.

Sa makausa pa, si Pablo nagdasig niini nga mga Kristohanon nga angayng mobati nga bug-os nga gawasnon ug magmasaligon sa pagduol sa Diyos ug mangupot pag-ayo sa ilang paglaom nga walay pagkatarog pinaagi niining dugang mga pulong: “Busa, mga igsoon, sanglit bug-os ang atong pagsalig nga mosulod ngadto sa balaang dapit pinaagi sa dugo ni Jesus, nga iyang gisugdan pagpatuman alang kanato ingong usa ka bag-o ug buhing dalan lahos sa kortina, nga mao, ang iyang unod, ug sanglit kita adunay dakong saserdote nga nagdumala sa balay sa Diyos, manuol kita uban ang matinuoron nga kasingkasing diha sa bug-os nga pagsalig sa pagtuo, kay nawisikan na ang atong mga kasingkasing gikan sa usa ka daotang tanlag ug ang atong mga lawas naligoan na pinaagi sa mahinlong tubig. Atong panguptan pag-ayo ang pagpahayag sa dayag bahin sa atong paglaom nga walay pagkatarog, kay kasaligan siya nga misaad.”​—Heb 10:19-23.