Ang Gregong termino nga e·par·kheiʹa, nga gihubad ingong “lalawigan,” nagtumong sa dapit nga nailalom sa awtoridad sa usa ka Romanong administrador. Sa dihang gipalapad sa Roma ang pagpanakop niini sa gawas sa peninsula sa Italya, ang teritoryo o ang dapit sulod sa mga utlanan nga pagamandoan sa usa ka gobernador gitawag nga usa ka lalawigan.

Niadtong 27 W.K.P. ang unang Romanong emperador nga si Agusto, nagbahin sa 22 ka lalawigan nga naglungtad niadtong panahona ngadto sa duha ka kategoriya. Ang napulo ka mas malinawong mga lalawigan nga wala magkinahanglan ug kanunayng presensiya sa Romanhong mga lehiyon nahimong mga lalawigan sa senado. Ang pangunang Romanong opisyal niining matanga sa lalawigan mao ang prokonsul. (Buh 18:12; tan-awa ang PROKONSUL.) Ang ubang mga lalawigan nahimong mga lalawigan sa imperyo, nga direktang nailalom sa emperador ug gidumala sa usa ka gobernador ug, ang mas dagkong mga lalawigan, gidumala sa usa ka komandante militar nga gitawag ug legado. Ang mga lalawigan sa imperyo sagad nahimutang duol sa utlanan o tungod sa ubang katarongan  nagkinahanglan ug mga lehiyon nga magpabilin didto; pinaagi sa pagkontrolar mismo niini nga mga lalawigan nahuptan sa emperador ang kasundalohan ilalom sa iyang awtoridad. Human sa 27 W.K.P. ang bag-ong mga lalawigan nga naporma gikan sa nasakop nga mga teritoryo nahimong mga lalawigan sa imperyo. Ang usa ka lalawigan mahimong bahinon pa ngadto sa mas gagmayng administratibong mga seksiyon o mga distrito.

Ang kahimtang sa usa ka lalawigan mahimong mausab tali sa pagkahimong lalawigan sa senado ug pagkahimong lalawigan sa imperyo. (Tan-awa ang CIPRO.) Dugang pa, usbon usahay ang mga utlanan sa usa ka lalawigan. Tungod niini, ang usa ka siyudad o dapit tingali maoy sakop sa usa ka lalawigan sa usa ka panahon ug sa ulahi nahimong sakop sa kasikbit nga lalawigan, o mahimo ganing sakop sa usa ka bag-ong naporma nga lalawigan. Ingong mga pananglitan, tan-awa ang CAPADOCIA; CILICIA; PAMFILIA; PISIDIA.

Sa dihang gihinginlan si Arquelao (Mat 2:22), ang anak nga lalaki ni Herodes nga Bantogan, ang Judea nailalom sa pagmando sa Romanong mga gobernador. Ang gobernador sa lalawigan sa usa ka sukod may kaakohan ngadto sa legado sa mas dakong lalawigan sa Sirya.

Sa dihang gitugyan si Pablo ngadto kang Felix didto sa Cesarea, ang gobernador “nangutana kon tagadiin siyang [Pablo] lalawigana, ug natino nga siya taga-Cilicia.” (Buh 23:34) Ang Tarso, ang yutang natawhan ni Pablo, maoy sakop sa Romanhong lalawigan sa Cilicia.​—Buh 22:3.

Ang gobernador sa usa ka lalawigan sa imperyo maoy tinudlo sa emperador sulod sa walay tinong yugto sa pangatungdanan, dili sama sa prokonsul sa usa ka lalawigan sa senado, nga sagad mag-alagad lamang sulod sa usa ka tuig. Si Felix gipulihan ni Festo ingong gobernador sa imperyal nga lalawigan sa Judea.​—Buh 25:1.

Tan-awa usab ang SAKOP NGA DISTRITO.