1. Anak nga lalaki ni Metusael ug kaliwat ni Cain. (Gen 4:​17, 18) Ang panahon sa iyang pagkinabuhi ug kang Adan nag-abot. Si Lamek may duha ka asawa, si Ada ug si Zila, ug mao ang unang daghag asawa sa rekord sa Bibliya. (Gen 4:19) Pinaagi kang Ada nakabaton siyag mga anak nga lalaki nga ginganlan ug Jabal, “ang mag-uugda niadtong mga nagapuyo sa mga tolda ug may kahayopan,” ug Jubal, “ang mag-uugda sa tanan niadtong nagagamit sa alpa ug sa plawta.” (Gen 4:​20, 21) Pinaagi kang Zila, si Lamek nanganak kang Tubal-cain, “ang mananalsal sa tanang matang sa himan nga tumbaga ug puthaw,” ug sa usa ka anak nga babaye nga ginganlag Naama.​—Gen 4:22.

Ang balak nga gitagik ni Lamek alang sa iyang mga asawa (Gen 4:​23, 24) nagpakita sa mapintas nga espiritu niadtong adlawa. Ang balak ni Lamek nag-ingon: “Patalinghogi ang akong tingog, kamong mga asawa ni Lamek; paminawa ang akong pulong: Usa ka tawo ang akong gipatay tungod sa pagsamad kanako, oo, usa ka batan-ong lalaki tungod sa paghampak kanako. Kon pito ka pilo si Cain panimaslan, nan si Lamek kapitoan ka pilo ug pito.” Dinhi dayag nga si Lamek nagpahayag ug usa ka kaso sa pagdepensa sa kaugalingon, nangatarongan nga ang iyang gihimo maoy dili-tinuyo nga pagbuno, sama sa gihimo ni Cain. Nangangkon si Lamek nga, sa pagdepensa sa iyang kaugalingon, iyang napatay ang tawo nga naghampak ug nagsamad kaniya. Busa, ang iyang balak maoy usa ka hangyo aron siya mahigawas batok niadtong nagtinguha sa pagpanimalos kaniya tungod sa iyang pagpatay sa miatake kaniya.

Mopatim-aw nga walay kaliwat ni Cain, nga nag-apil sa mga anak ni Lamek, ang naluwas sa Lunop.

2. Kaliwat ni Set; anak nga lalaki ni Matusalem ug amahan ni Noe. (Gen 5:​25, 28, 29; 1Cr 1:1-4) Ang mga panahon sa pagkinabuhi niini nga Lamek ug ang kang Adan nag-abot usab. Si Lamek may pagtuo sa Diyos, ug human nganli ang iyang anak nga lalaki nga Noe (lagmit nagkahulogang “Pahulay; Paghupay”), siya namulong: “Kini siya magdala kanato ug kahupayan gikan sa atong buhat ug gikan sa kasakit sa atong mga kamot gumikan sa yuta nga gitunglo ni Jehova.” (Gen 5:29) Kining mga pulonga natuman sa dihang ang tunglo sa yuta gikuha sa panahon ni Noe. (Gen 8:21) Si Lamek nakabaton ug ubang mga anak nga lalaki ug babaye. Nabuhi siya sa 777 ka tuig, namatay mga lima ka tuig sa wala pa ang Lunop. (Gen 5:​30, 31) Ang iyang ngalan gilista sa talaan sa kagikan ni Jesu-Kristo sa Lucas 3:36.